Көлік өрті көбейген
2020 жылдың бірінші тоқсанында Қостанай облысында көліктердің өртену оқиғасы 28 рет тіркелсе, биылғы төрт айда 41 транспорт өртенген. Бұл туралы ТЖД баспасөз қызметі хабарлады.
Бірер күн бұрын Рудныйда "Волга" және Audi-80 автокөліктері өртенсе, Қарабалық ауданында "Деталь" автодүкенінің жанында "Лада Ларгус" автомобилінің моторы жанып кетті. Сондай-ақ осы ауданға қарасты Наука ауылында "Лада Калина" автокөлігі өртенген.
Құтқарушылар өрттер негізінен қауіпсіздік ережелерін сақтамаудан туындағанын айтады. Осындай жағдаяттарды болдырмау үшін ТЖ департаменті 17 мамырдан 17 маусымға дейін автокөлікте өрт қауіпсіздігін сақтау айлығын өткізеді.
