Қоржында – 12 медаль

Семей қаласында кикбоксингтен ерлер мен әйелдер арасында Қазақстан Республикасының Чемпионаты өтті. Бұл додада қостанайлық спортшылар 5 алтын, 2 күміс және 5 қола жүлдеге ие болды.

Жарысқа Қазақстанның барлық аймағынан ұзын саны 200-ден астам спортшы қатысқан. командалық есепте Қостанай облысының құрамасы 2-орыннан көрінді. Өңір қоржынына жүлде салған спортшылар ішінен әйелдер арасында 48 келі салмақ дәрежесінде Ариза Сманова және 52 келіде Алина Төлегенова алтыннан алқа тағынды. Ал ерлер арасында Талғат Букбасов (54 келі), Мәди Тоқтаров (86 келі) және Темірлан Қабиев (91 келі) 1-орын жеңіп алды. Дидар Төлебаев (63,5 келі) мен Айбек Мұқашев (+91 келі) күміс медаль иеленді. Қола жүлде иегерлері – Азамат Бермұхамбетов (+91), Тимур Әлімжанов (54 келі), Дияр Қожақов, Жанат Саржанов (60 келіден) және Сапар Тұманов (75 келі).

«Бұл чемпионатқа Қостанай облысы командасын кикбокстан аға бапкер Әскер Макубаев, халықаралық деңгейдегі төреші, ҚР спорт шебері Азамат Сумамбаев және халықаралық деңгейдегі спорт шебері Азамат Бермұхамбетов жаттықтырды. Осы жарысқа баруға қолдау жасаған Қостанай облысы әкімдігінің Дене шынықтыру және спорт басқармасына алғыс білдіреміз. Сондай-ақ, чемпионатты ұйымдастырған ҚР Кикбокс федерациясына, ШҚО Кикбокс федерациясына және Семей қаласы әкімшілігіне рахмет айтамыз», -дейді Қостанай облысы Кикбокс федерациясының президенті Дәмір Қалқаев.

Айта кетейік, бұл спорт сынында командалық есепте 1-орынды Нұр-Сұлтан қаласы жеңіп алса, үздік үштікті Атырау облысы түйіндеді.