Абаттандырылған аудан орталығы

Жақында  Денисов ауданында шағын футбол алаңы ел игілі-гіне ұсынылды. Спорттық алаңның құрылысына жергілікті бюджеттен 8 млн. теңге бөлініпті. Мердігер компания  "СТК Прайм" ЖШС қаржыны толық игеріп, құрылыс жұмысын уақытында аяқтады. Спорт нысаны ашылысымен, мұнда ағылғандардың қатары қалың болған.  Осыны ескерген жергілікті билік өкілдері аяқ допшыларды жас ерекшеліктеріне сай топ-топқа бөліп, арнайы кесте құруды жөн көріпті. Салауатты өмір салтын қалыптастыру және спортты насихаттау мақсатында,  мұнда ауданның мекемелері арасында футболдан сайыс жиі ұйымдастырылып тұрады.   Өткен демалыс күндері аудан кө-леміндегі мекемелерден келген 12 топ өзара бақ сынасты. Тартыс-ты бәсекені тамашалауға келгендердің қатары қалың болған еді.

Жергілікті билік өкілдері аудан орталығын спорт алаңына айналдыруды мықтап қолға алған сыңайлы. Олай дейтініміз, жақында бұл арада теннис кортын ашу жоспарланған. Осы мақсатта, жергілікті бюджеттен 3 млн.теңге қарастырылыпты. Спорт нысаны осы айдың аяғында қолданысқа енгізілмек.

Бұдан өзге ауданның орталық саябағы да жаңартудан өткізіледі. Жергілікті кәсіпкермен жасалған меморандум негізінде ашық алаңды абаттандыруға 4,2 млн.теңге жұмсалатын болыпты. Денисовтықтар жаңа бақта қазан айының аяғында демалатын болады.  Сонымен қатар, аудан орталығындағы бес көшені жарықтандыру жоспарланыпты. Нақты тоқталар болсақ, "ЭПК Форфайт" ЖШС Пушкин, Комсомол, Целинная, Набережная және Некрасов көшелеріне шам орнатпақ ниетте. Осы мақсатқа бюджеттен 9,238,5 мың теңге бөлінді.