БІЗДЕН ДЕ БІРЕР СӨЗ
Болат Смадияров,
Денисов ауданы әкімінің орынбасары:
Спорт тақырыбы кеңірек қамтылса дейміз
Аймақтағы жалғыз ана тілді басылымның Тобыл өңірін аралап, тұрғындардың тыныс тіршілігімен танысып жатқаны көңіл қуантады. Өз басым "Қостанай таңын" қазақ тілінің, салт-дәстүріміздің басты жоқтаушысы деп білемін. Газет бетінде жас ұрпаққа тәрбие берер көптеген дүниелер жарық көріп жатыр. Тағылымы мол "Бас редактор әлемі", "Алдыңғы толқын – ағалар" айдарлары, ел жаңалықтарынан хабардар ететін "Тобыл-Торғай тынысы" да көңілімнен шығады. Денисов ауданы тұрғындарының ширегін ғана құрап отырған қаракөздеріміздің дені "Қостанай таңы" газетінің тұрақты оқырмандары. Алдағы уақытта олардың қатары толысарына нық сенімдімін. Сіздерден өтініп сұрайтынымыз, төл басылымымызда спорт тақырыбын кеңірек қамтысаңыздар екен. Әсіресе, ұлттық спорт түрлерінің, облыстағы, біздің аудандағы өтетін спорттық жарыстарды жазсаңыздар жақсы болар еді.
Инна Егер,
Аудандық тілдерді оқыту орталығының оқытушысы:
Уақыт талабына сай
Қазіргі кезде үштұғырлы тіл – уақыт талабы. Тәуелсiздiк алғаннан бергi уақытта елiмiзде тiл сая-саты мемлекет басшысы Н.Назарбаевтың тiкелей басшылығымен салиқалы да сындарлы түрде жүзеге асырылуда.
Мемлекетімізде тілдерді оқыту мәселесін шешу мақсатында тілдерді оқыту орталықтары ашылуда. Бірақ барлық жауаптылықты мемлекетке жүктеуге болмайды деп ойлаймын. Әр адамның өз ынтасы болуы қажет.
Мемлекеттік тіліміз – қазақ тіліне тоқталып кетсек, менің ойымша, Қазақстанда тұрып қазақ тілін білмеген өте қолайсыз. Мен Қазақстаннан басқа елде тұрмайтынымды мектепте оқып жүрген жасымда саналы түрде түсіп, анық қажеттілік ретінде қабылдадым. Тіл үйрену мен үшін ешқандай қиындық туғызбады, өзімді мектепте оқытқан мұғалімдерге мың да бір алғысымды айтамын.
Мен өзіме қатал сын көзімен қараймын. Өз тілімді одан әрі жетілдіруге қажет деп ойлаймын. Қазақ тілінде жарық көретін БАҚ-тан қажетті ақпаратты білуге тырысамын. Аудан деңгейінде өткізілетін іс-шараларына қатысып, қазақ, орыс, ағылшын тілдерінде жүргізуші болып жүрмін. Екі жыл бұрын "Мемлекеттік тіл – мемлекеттік қызметте" атты аудандық байқауға қатысып, бірінші орынға ие болдым. Өткен жылы "Абай оқулары" атты облыс-тық байқауына қатыстым. Бұл мен үшін өте маңызды және үлкен жетістік. "Қостанай таңы" – менің үлкен көмекшім.
