Этнографиялық экспедиция – Қостанайда
Өткен жұмада Қостанайға екі күндік сапармен "Менің елім – Мәңгілік Ел: Каспийден Алтайға дейін" этнографиялық экспедициясы мүшелері келіп кетті.
Қазан айының алғашқы жұлдызында Ақтау қаласынан авто-экспедиция жолға аттанған болатын. Елдің туристік әлеуетін дамытуда осындай бастаманың маңызды екендігі сөзсіз. 45 күнге созылатын сапар барысында Қазақстанның барлық өңірлерінің білім, мәдениет, туризм және экономикалық ахуалын айшықтайтын шаралар өткізіледі.
– Экспедициямыздың мақсаты – Елбасының Қазақстан халқына арналған Жолдауындағы тапсырмалар мен мақсаттарды насихаттау. Елдің әр аймағынан фото мен бейнематериалдар жинап жүрміз. Ол еліміз туралы фотокітап пен фильмдерге енеді.
Қазақстанның тыныс-тіршілігін, көпұлтты республиканың негізін көрсет-кіміз келеді, – деді экспедиция жетекшісі Евгений Рибалко облыс әкімінің орынбасары М.Дәрібаевпен кездесуде.
362 әулиелі Маңғыстау өңірінен басталған сапар құрамында этнографтар, еріктілер, журналистер, фотосуретшілер бар. Бұған дейін олар он күн бойы республиканың төрт қаласын басып өтіп келеді екен. Бір қуантарлығы, сапарға шыққандар Қостанайда құрастырылған, сырты мемлекеттік рәміздермен, ұлттық нақыштармен безенді-рілген 5 Ssang Yong Nomad автокөліктерімен кетіп барады. Бұның өзі отандық автокөлікті насихаттаудың бір үлгісі дейді сапарға шыққандар. Олар Қостанайдың орталық көшелерінде авто шеру ұйымдастырып, ұлы ағартушы Ыбырай Алтынсарин кесенесіне зиярат етті. Жастармен кездесіп, өздерінің алған әсерлерімен бөлісіп жатты. Өңірімізден шыққан ұлы тұлғалар, жер-су аттары, мәдениетімен танысты. Екі күн бойы Тобыл жерінде аялдаған сапаршылар Солтүстік Қазақстанға жол жүріп кетті.
Экспедицияның қорытындысы бойынша үстіміздегі жылдың қараша айының соңында елордамыз Астанада Мемлекет басшысының қатысуымен арнайы шара ұйымдастыру жоспарланып отыр.
Шұға
ҚОҢҚАБАЙ
СУРЕТТЕ: экспедицияға қатысу-шылар.
СУРЕТТЕ: экспедицияға қатысушылар.
Суретті түсірген Айбек ЖҮЗБАЙ.
