QR-кодты күнтізбе

Ыбырай Алтынсариннің 180 жылдығына арналған күнтізбе шықты. Оның ерекшелігі – QR-код арқылы ұлы ағартушының өмірімен, жасаған еңбегімен танысуға болады.

Қостанай облысының Ы.Алтынсарин мемориалдық музейі салтанатты іс-шара ұйымдастырып, күнтізбені көпшілікке көрсетті. Мағыналы мәжіліске өңірдегі ғалымдар мен ұстаздар шақырылды.

«Биыл қайраткер тұлғаның 180 жылдығымен қатар, есімі берілген қара шаңырақ – музейдің ашылғанына 30 жыл. Қостанай қаласының қақ ортасынан дала ұстазының ескерткіші ашылуы – мерейтойдың тамаша бастамасы болды. Осы мерейлі жылға орай көптеген іс-шара жоспарладық. Соның бірі – бүгінгі іс-шара», – деп атап өтті музей директоры Марғұлан Оспанов.

Оның айтуынша, ұлы ұстаздың 180 жылдығына байланысты күнтізбе 180 дана болып шығарылып отыр.

Ыбырайтанушы ғалым, ақын Серікбай Оспанұлы мен белгілі ұстаз Пиалаш Сүйінкина күнтізбенің лентасын қиды.

«Қазаққа Ыбырайдай жаны ашып еңбек еткен тұлғалар аз» – деп Серікбай Оспанұлы ағартушының елге сіңірген еңбектері жөнінде баян етті.

Жиналғандар Ы.Алтынсарин туралы түсірілген деректі фильмді тамашалап, игі істің бастамашысы болған музей ұжымына ризашылық білдірді.

 

Аслан Қанғожин