Үлгілі ұсыныс, игі идея

Осы жыл үлкен мерекелермен тұспа-тұс келіп отыр. Ең алғашқысы, әрине, тәу етер Тәуелсіздігіміздің 30 жылдығы. Одан кейін қазақ ұлтының көптеген әйгілі тұлғаларының мерейтойлары атап өтілмек. Басқасын айтпағанда, ұлы ағартушы, жерлес бабамыз Ыбырай Алтынсариннің 180 жылдығының өзі орны бөлек мәнді мереке болғалы тұр. Әйтсе де жер-жаһандағы қазіргідей ауыр ахуал кезінде, расын айту керек, мерейтойларды даңғаза-дабырамен, думан-тоймен, пайдасыз жиын-отырыстармен өткізудің жөні жоқ. Әр атаулы датаны ел болып ескерудің басқаша мән-мағынасына үңілер кез жетті. Мінекей, Мемлекет басшысы Қасым-Жомарт Тоқаев та осыған қатысты ұтымды ұсыныстарын дер шағында жариялап, тиісті тапсырмалар жүктеп отыр. Президенттің Тәуелсіздік мерекесін атап өтудің тағылымдық мазмұнына зер салу туралы айтқаны – аса құптарлық дүние. Ел тарихы үшін маңызды оқиғаны құр дүрмек пен рәсуаға арнамау, бұған идеологиялық тұрғыдан қарау  – елдігімізге сын болар сәт. Қ.Тоқаевтың Тәуелсіздік мерекесінің тұжырымдамасын «Жасампаздыққа толы жылдар» деп атауының мәні осында деп түсінемін.  

            «Үкімет менің тапсырмам бойынша Әлеуметтік кодекстің жобасын дайындап жатыр. Кодекс азаматтардың, әсіресе, көмекке мұқтаж адамдардың сұранысына толық сай келуі керек. Бұл біздің әділетті мемлекет пен ашық қоғам құру туралы идеямызбен үндеседі. Министрлер мен әкімдер «Халық үніне құлақ асатын мемлекет» қағидасын берік ұстануға тиіс. Азаматтардың арыз-тілектеріне жедел жауап беру қажет. Ең бастысы, Тәуелсіздіктің игіліктерін әрбір отандасымыз күнделікті тіршілігінде сезіне алатын болса – мақсатымыздың орындалғаны», – деді Қасым-Жомарт Кемелұлы.

Даңғырлақ «даңқтың» жалауын желбірете бермей, халықтың жағдай-тұрмысын көтеру – басты шарт. Елдің әлеуметтік жағдайы әлжуаз болса, жетістіктерді мақтан етудің қажеті шамалы. Мемлекет басшысының айтпағы осы.Сондай-ақ, оның айтуынша, осы жылы атқарылатын шаралардың көбі жастарға арналмақ. Оларды жұмыспен қамту, жаңа жобалар аясында жан-жақты қолдау көрсету туралы идеялары көңілге қонды. Ұлы тұлғалардың мерейтойы аясында құнды еңбектерін насихаттауға екпін салынбақ. Тіпті, әз Наурыз мейрамына да жаңаша көзқараспен қарау керегін сөз етіп, «Таза табиғат» атты игі жобаны жүзеге асыруды ұсыныс етті. Жалпы, түсінгенім, президентіміз «той емес, ой қуатын уақыттың» жеткенін іспен дәлелдеуге шақырғандай. «Көп шуылдақ не табар, басқармаса бір кемел» деп Абай айтпақшы, үлгілі ұсыныс, игі идеяны алға тартқан Мемлекет басшысының бастамасын неге қоштамасқа? Өз басым, пайдалы, кәделі, әдемі ұсыныстарды қашанда қос қолымды көтеріп қолдаймын.

Қанат РАЖАНОВ,

педагог,

мәдениет саласының қызметкері