Мамандықтың төресі – металлург
Бұл – «ССКӨБ» АҚ Металл илектеу зауытының жас маманы Олжас Маяновтың сөзі. Оның айуынша, металлург болу үшін шыдамдылық, жүректілік, асқан жауаптылық, мықты жігер керек. Анадай оттың ортасында жүріп, оны өзіне бағындыра болат балқытуға кез келгеннің жүрегі дауалай бермейтіні хақ.
– Тұңғыш Президентіміз Нұрсұлтан Назарбаев «Менің өмірімде Теміртау мен Магнитка болмаса, мен ешқашан Президент болмас едім» деп жиі айтады. Шынымен де, от пен болаттың арасында жүріп шымырдай шынығасың, тәртібің темірдей берік болады, – дейді ол.
Прокат цехының шебері Олжас Дәуітұлы – Өзбекстанның тумасы. Науаи мемлекеттік тау-кен институтын тәмамдап, 4-5 жылдай металлургия комбинатында еңбек еткен.Кейін 2014 жылы атамекеніне оралған жас жігіт Металл илектеу зауытына жұмысқа орналасады.
Еңбекке адалдығы, жұмысына тиянақтығы мен жауапкершілігімен көзге түскен Олжас бір жылда слесар-жөндеушіден шебер болып шыға келеді. Бүгінде ол зауыттағы негізгі өнім шығару, ұнтақтағыш болат шарлар мен өзектердің фабрикаға және ERG кәсіпорындарына жөнелтілу барысын қадағалайды.
– Прокат цехында 54 адам жұмыс істейді. Мұнда қауіптілік деңгейі өте жоғары. Басты себептері – газ, жоғарғы температура, ыстық леп, балқыған метал. Бір жағынан көлемді техника, крандар жүктерді тасып жатса, бір жағынан теміржолмен өнімдерді жөнелтіп жатамыз. Сондықтан да қауіпсіздік шараларын қатаң сақтаймыз. Пандемияға байланысты маска тағып жүруді де естен шығармаймыз, – дейді металлург.
Олжас кәсіпорындағы «Идеялар фабрикасы» жобасына да белсене қатысып, оңтайландыру жөніндегі өз ұсынысын өндіріске енгізген. Осы бағыттағы ізденістерін бүгін де жалғастырып келеді.
Өзін білікті маман ғана емес белсенді жас ретінде көрсете білген Олжас отбасын құрып, екі ұлы мен бір қызының қызығына тоймай келеді.
– Мүмкіндік пайдаланып барша әріптестерімді келе жатқан Металлургтер күнімен құттықтаймын. Барлығымыздың деніміз сау, бауырымыз бүтін болсын! Сындарлы сыннан сүрінбей өтіп, жұмыста табыстарға жете берейік! – дейді ол.
Қатарының алды болған Олжас Маяновтың тілегіне қосылып, оған да толағай табыстар тілейміз! Іске сәт!
Қуаныш ЕСҚАБЫЛ
