Алаш аза тұтқан күн
Елімізде қалыптасқан ахуалға байланысты халыққа үндеу жасаған ҚР Президенті Қасым-Жомарт Тоқаев 13 шілдені Ұлттық аза тұту күні деп жариялады. Соған байланысты Қазақстанда коронавирус пандемиясының құрбаны болған азаматтарды еске алуға байланысты Нұр-Сұлтан уақытымен сағат 12:00-де бір минут үнсіздік жарияланды. Осы уақытта Қостанай облысы әкімдігінің ғимаратындағы Мемлекеттік ту төмен түсіріліп, өңір басшысы Архимед Мұхамбетов бастаған бір топ қызметкерлер КВИ құрбандарын еске алды.
Аза тұту күні – тек назалы уақыт емес, елдің еңсесін көтеретін, алды-артымызға бағдар беретін күн. Сол себепті, Қасым-Жомарт Тоқаев өз үндеуінде індетпен күрес жалғасатынын, алдын алу шараларының күшейетінін айтты. Мемлекет басшысы коронавирусқа қарсы қосымша шараларды да атап өтті. Нақтырақ айтқанда, елде алғашқы медициналық-санитарлық көмек күшейтіліп, ауруханаларда төсек орындарының саны арттырылады.
Күні кеше Қостанай облысында провизорлық госпиталь ашылды. Бұл шешім өңірде прозиворлық төсек-орындардың жетіспеуіне байланысты қабылданды. Стационарға 100 төсек-орын қойылып, оттегі және қажетті құрылғылар мен медициналық жабдықтар, дәрі-дәрмектер жеткізілді.
Суреттерді түсірген Б.Ахметбеков
