Әр отбасы қайғысы – тұтас халық қайғысы

Дүние жүзін деміктіріп отырған дерт Қазақстан жұртының да қабырғасына қатты батты. Әсіресе, соңғы уақыттарда қайғылы хабарларға жиі душар болып кеттік. Жүрек сыздайды, көңіл алай-түлей күйге түседі, амал нешік? Әр отбасының қайғысы – тұтас халықтың қайғысы. Әр шаңырақтың амандығы – бүкіл ұлттың есендігі… Осы аты өшкір індеттен көз жұмған қазақстандықтардың мәңгілік рухына зиярат ету үшін Үкімет 13 шілдені Қаралы күн деп жариялады. Бұл дата бұдан былай жалпы ұлттың қара жамылатын, құрбандардың рухына дұға бағыштайтын күніне айналады. 
Расында, Қазақстанның көпұлтты жұрты қашаннан қуанышта да, қайғыда да бірге болып келеді. Ауызбірліктің арқасында еңсерілмеген қиындық, бастан өтпеген сынақ жоқ. Бұл тәжтажалдың қара шеңгелінен де ынтымақтың, сабыр мен сақтықтың демеуімен сытылып шығарымыз сөзсіз. Ол үшін, бастысы, ұнжырғамыз түспей, еңсеміз езілмей, заңмен, қаулы-қарармен бекітілген талап-тәртіпке бекем болып, оны күнделікті тіршілік-қарекетімізбен сәйкестендіру керек, қазіргі өмір салтына бағыну қажет. Сонда ғана ел іші есен-сау болып, қайғы артынан қуаныш келері анық! Алла тағала қазақ жұртына амандық, ұзақ ғұмыр нәсіп етіп, марқұмдардың жанын жәннат төрінде шалқытсын!

 

Жолбарыс қажы Баязид,
ақын,

Қазақстанның Жазушылар одағының мүшесі