Аймақта қандай хабар бар?
Жәрмеңке шақырады
Қостанай. Облыс орталығында кезекті рет кең көлемді жәрмеңке өтеді. Азық-түлік сауда-саттығына қалалар мен аудандардың ауыл шаруашлығы тауарларын өндірушілер қатысады. Баға әдеттегідей нарықтағы құннан 15-20%-ке арзан болады. Шара Абай даңғылы бойындағы "Емшан" сауда үйі маңында, жабық павилонда таңғы сағат 9.00-де басталмақ.
Нәпақадан қағам деп…
Қарабалық. Қол астындағы қызметкеріне жалақысын толық көлемде және уақытылы төлемей келген аудандық Ветеринарлық станция басшысы жұмыстан қуылды. Оның Еңбек заңнамасын бұзғаны анықталды. Сондай-ақ, жапа шегуші әйелдің арызын қанағаттандырған сот бұл мекемеге 60 АЕК көлемінде айыппұл төлеуді міндеттеді.
Балықшылар бәсекесі
Науырзым. Буревестник ауылында балық аулаудан турнир өтпек. Жеңімпаздарға бағалы сыйлықтар тігіліп отыр. Жарыста 9 жүлде және аталымдар сарапқа салынады. Қатысқысы келген тұрғындардан талап етілетіні – өздерімен бірге екі қармақ және балық аулауға арналған жем әкелулері керек. Турнир аясында көңілді сауық ұйымдастырылып, ыстық сусындар тегін үлестіріледі. Байқауды өткізу алдағы сенбі күніне жоспарланған.
Вобейбол турнирі өтті
Сарыкөл. Социалистік Еңбек ері Ғазиз Сексеновті еске алуға арналып, волейболдан аудан кубогы өтті. Турнирге жеті команда қатысты. Жарыс қорытындысы бойынша, 1-орынды "Сарыкөл" құрамасы жеңіп алды. 2-орын Урицкий метеп-лицейіне бұйырса, Комсомол орта мектебі 3-ші тұғырдан көрінді. Жеңімпаздар медальдермен, мадақтама және кубокпен марапатталды.
Есірткі мен қару сақтаған
Жітіқара. Пәтерінде жалпы салмағы 693 грамм болатын "гашиш" есірткілік затын сақтаған 25 жастағы күдікті ұсталды. Ер адам есірткіні 11 орамада сақтап келген. Мұның сыртында, полицейлер тінту жүргізу кезінде кереует астынан 12 калибрлі аңшылық шолақ мылтық тәркіледі. Қазір сотқа дейінгі тергеу амалдары жүргізіліп жатыр.
Тарихсыз болашақ жоқ
Лисаков. Қалалық мәдениет және спорт орталығында Алтын Орданың 750 жылдығына арналған "Қазақстан тарихындағы Алтын Орда дәуірі" атты жиын өтті. Оған жергілікті билік өкілдері, қаланың құрметті азаматтары, оқытушылар мен белсенді жастар қатысты. Спикерлер тарихи-танымдық баяндамалар жасады. Атаулы датаға орай құрылған жоспарлармен бөлісті.
