81 адам жолда қалған

18 ақпаннан бастап, облыстың автожолдарындағы төтенше жағдайлардың алдын алу мақсатында жедел штаб күндіз-түні жұмыс істеп жатыр. Штаб құрамында жол ұйымдары, азаматтық қорғау және ішкі істер органдарының өкілдері бар.   Алғашқы тәулікте облыстық ТЖД бөлімшелері, полиция қызметкерлері және жол қызметі 10 апаттан құтқару жұмыстарын жүргізді. Жалпы саны 81 адам құтқарылды, олардың алтауы – балалар. Қар құрсауынан 45 көлік шығарылған. Құтқару жұмыстарына ТЖД мен ІІД-нің 15 көлігі және 41 қызметкер жұмылдырылды. Жолдың қарын аршуға 10 арнайы техника, 20 жұмысшы жіберілген.

Ауа райы бұзылып, қалың қар түсіп, боран соғып, жел жылдамдығы 23-28 м/с-қа жетуіне байланысты, облыс аумағында автокөлік қозғалысына шектеу қойылды. Республикалық маңыздағы 5 және облыстық маңызға ие 23 жол уақытша жабылды.

Облыстық ТЖД тұрғындарға боранды күні жолға шықпауды ескертеді.