Мереке алдындағы шаттық

Тәуелсіздік күні қарсаңында баспаналы болып жатқандардың қатары артуда. Солардың бірқатары қаламыздағы Юбилейный шағын ауданындағы №47 үйден пәтер алып, қуанышқа бөленді. Қоныстанушыларды облыс әкімі А.Мұхамбетов құттықтап, 66 пәтердің кілттерін заңды иелеріне жеке-жеке табыстады.

 

– Тұңғыш Президент, Елбасының тапсырмасы бойынша жүзеге асырылып отырған «Нұрлы жер» бағдарламасы аясында, «Бақытты отбасы» бағыты бойынша көпқабатты тұрғын үйдің кілттерін халыққа тапсырғалы тұрмыз. Бұл үйдің құрылысына бюджеттен 526 млн 400 мың теңге жұмсалды. Үйдің көлемі – 4 116 шаршы метр. Мердігер – «Сыл» компаниясы. Тұрғын үйдің құрылысы бүгінгі таңда барлық өңірлерде қарқынды жүріп жатыр. Жалпы, ағымдағы жылдың қорытындысы бойынша осы бағдарлама аясында 330 мың шаршы метр тұрғын үйді пайдалануға тапсыруды жоспарлап отырмыз. Өткен жылмен салыстырғанда ол 10 пайызға жоғары. Көп балалы, мүгедек балаларды тәрбиелеп отырған отбасылар және «Тұрғын үй құрылыс жинақ банкінің» салымшылары бүгін баспаналы болуда. Қазір облысымызда тұрғын үйге ақша жинайтындардың қатары артып келеді. Алдағы уақытта «Қонай» мөлтек ауданында тұрғын үй құрылыстары басталады. Ол жерде 30 көп қабатты үй салынады. Сонымен қатар, «Береке» шағын ауданында 72 көп қабатты үй салынатын болады. Демек, алдағы екі-үш жылда жоспарланған құрылыс көп. Ең бастысы, тұрғын үйдің құнын сол қалпында ұстап тұруға тырысамыз. Тобыл өзенінің жағасында «Нұр әлем», «Астана», «Бәйтерек» сияқты жаңа шағын аудандар пайда болады. Оның сыртында көптеген әлеуметтік нысандар да қолға алынады. Тобыл өзенінің жағасында саябақ салынады. Мұның бәрі де біздің тұрғындар үшін, – деп облыс әкімі көпшілікті мерекемен құттықтап, пәтер иелеріне кілтті табыс етті.

 

Бүгінгі күні баспаналы болғандардың қуанышында шек жоқ.

 

–Салымшы ретінде банкке үш жыл бойы ақша жинақтадым. Жарты жыл күтіп, құжаттарым өтіп, кеше ғана «ертең пәтер кілтін аласыз» деп телефон соққанда күні бойы сенер сенбесімді білмей жүрдім. Мереке қарсаңында шынымен де тамаша сыйлық болды, – деп лебізімен бөлісті Гүлжанат Әмірхамзина.

Ал осы пәтерді 12 жыл бойы аңсап күткен жалғызбасты ана Гүлнар Лекерованың қуанышы қойнына сыймай тұр.

–Расымен де баспанасыз 12 жыл жүрдім. «Бақытты отбасы» бағдарламасы бойынша арманыма қолым жетті. Енді жаңа жылды қызымыз екеуміз өзіміздің үйімізде қарсы алатын боламыз, – деп ерекше шаттанды.

Осы жерде жиналғандардың барлығына бүгінгі күн ең бір бақытты сәттердің бірі болмақ екені шындық. Баспаналы болып, армандарына қол жеткізіп жатқандарын тіптен айтып жеткізе алмай қуануда. Туған туыс, жақындар да осы сәтті бөлісу үшін арнайы келіп, көрші-көлем болып шашу шашып, шаттануда.   

Айтолқын АЙҚАДАМОВА

Суреттерді түсірген Бердіболат КӨРКЕМБАЕВА