Ұлттық спорт дәріптелді

Ұлттық сананы жаңғырту – халқымыздың болашаққа нық қадаммен ілгерілеуінің басты негізі. Ауқымы кең «Рухани жаңғыру» бағдарламасы осының кепілі болмақ.

Рудныйда бағдарламаны жүзеге асыру мақсатында ұлттық спорт түрлері бойынша VIII облыстық фестиваль өтті. Іс-шараның ашылу салтанатында спортшыларды құттықтаған Қостанай облысы әкімінің орынбасары Марат Жүндібаев соңғы жылдары ұлттық спортқа деген қызығушылық арта түскенін алға тартты. Бұған дәлел ретінде дәстүрлі фестивальге қатысушылар санының өскенін келтірді. Сан бар жерде сапа да болады. Биыл додаға облыстың 4 қаласы мен 16 ауданынан 500-ге тарта спортшы келді. Олар тоғызқұмалақ, асық ату, қазақ күресі, арқан тарту, қол күресі бойынша өз бақтарын сынады.

 

Екі күнге созылған жарыстар №7, 19 мектеп пен «Горняк» жастар-спорттық кешенінде өтті. Оның қорытындысы бойынша жалпыкомандалық есепте 3-орынды 76 ұпаймен Федоров ауданының құрамасы иеленді. Екінші орынға 97 ұпаймен Қостанай қаласының спортшылары көтерілді. Қостанайлықтар жеке есепте қазақ күресінен алдына жан салмады. Ал фестивальдің жеңімпазы деп 109 ұпайды жинаған Рудный қаласының құрамасы танылды. Алаң иелері тоғызқұмалақ, асық ату, арқан тарту және қол күресі бойынша барлық 1-орындарды жеңіп алды. Барлық жүлдегерлер дипломдармен және арнайы кубоктармен марапатталды.

Қуаныш ЕСҚАБЫЛ