Оқушыларға қанат бітірген
Бүгін облыстық білім басқармасының ұйымдастыруымен Е.Өмірзақов атындағы облыстық филармонияның күмбез залында Қостанай облысы әкімінің орынбасары М.Жүндібаевтың қатысуымен жеңімпаздарды марапаттау рәсімі өтті.
Салтанатты рәсімге қатысу үшін облыстың барлық өңірлерінен 140 оқушы қатысты. Олар республикалық және халықаралық зияткерлік, шығармашылық және спорттық жарыстардың жеңімпаздары мен жүлдегерлері, оқушылар арасында жүлдегерлерді дайындаған мұғалімдер, қалалар мен аудандардың білім бөлімдерінің басшылары, облыстық білім беру ұйымдарының директорлары қатысты.
«Ұлы ойшылдардың даналығы – халықтың рухани күші» диалогтық алаң аясында зияткерлік, шығармашылық және спорттық сайыстарда биіктерге жеткен оқушылар өздерінің жетістіктері туралы айтып берді.
Іс-шарада оқушыларға естелік сыйлықтар табыс етілді. Бағдарламада облыс әкімі А.Мұхамбетовтің ашық хаттарымен, «Триумф» мүсіндерімен және ноутбуктармен, ал олардың педагогтары мен жаттықтырушыларын Қостанай облысы әкімінің грамоталарымен және бағалы сыйлықтармен марапаттау көзделіп отыр.
Салтанатты шараның құрметті қонақтарының арасында «Тобыл» футбол клубының бас бапкері Нұрбол Жұмасқалиев, «Қазақстанның 100 жаңа тұлғасы» жобасының жеңімпазы Қайрат Маишев, WorldSkills International халықаралық сарапшысы Анзор Саидов, «IT планета» халықаралық олимпиадасының жеңімпазы және «Жастардың алтын кітабы» жобасының лауреаты Максим Рюмин болады.
Суреттерді түсірген Бағдат АХМЕТБЕКОВ.
