Өнерлі отбасы – ел мерейі
Отбасы бүкіл ғасырлар бойы адам баласы тәрбиесінің құралы болып келеді. Сондықтан ол адам үшін ең үлкен мәнге ие орта. Отбасы белгілі өнермен дәстүрлердің, жағымды өнегелердің, мұралардың сақтаушысы.
Сондай отбасылардың бірі – аудандық, облыстық, республикалық деңгейдегі өнер байқауларына қатысып, киелі сахнада тамылжытып ән салып, талайды тамсандырып, ерекше әуен, бұлбұлдай үндерімен өнер сүйер қауымды баурап алған Хасенхановтар отбасының өнер жолындағы өзіндік орындары ерекше. Тума талант иесі жыршы , термеші Сардан Әбікеивтің, өнер жолындағы ұстазы сазгер Болат Хамзиннің тағылымды тәрбиесін көрген. “Ұстазы жақсының – ұстамы жақсы” Кәдіржан Хасенханов ауданымыздың бетке ұстар белгілі әншісі және Нұрханың толғауларын нақышына келтіріп, орындаушылық шеберлігімен танылған термеші. Жұбайы Гүлбану Сейтқасым аудандық мәдениет үйінің күміс көмей әншісі, ұйымдастырушылық қабілетінің арқасында аудан көлемінде өтетін мерекелік іс – шаралардың бағдарламасын жазып, сөз саптау мен үйлесімін ұштастырып, ел алғысына бөленіп жүрген аяулы жан.
Кәдіржан Сахабеденұлы мәдениет үйінде қызмет жасай жүріп, өнерлі шәкірттер тәрбиеледі. Олар облыстық байқауларды топжарып, ел мерейін өсіріп, ұстаздың үкілі үмітін ақтады. Шәкірттерінің жеткен жетістіктері Кәдіржанның арқасы. Өнерлі отбасының ұйтқысы әрі тірегі бола білген Кәдіржан мен Гүлбану бір ұл,үш қыз тәрбиелеп, бақытты ата – ана атанды. Ұлы Мұратбек пен қызы Гүлнар Астана қаласында өздерінің кәсіптерін жандандырса,келіні Гүлбаян қалалық әкімдікте жұмыс істейді.Майнұр Астана қаласындағы Т.Рысқұлов атындағы университетінің қаржы және экономика факультетін тәмамдап, аталмыш оқу орнында мамандығы бойынша қызмет жасап жатыр. Жанар осы жоғарғы оқу орнында информатик – программист факультетінің сырттай бөлімінде оқи жүріп, Астана қалалық Сарыарқа ауданы әкімдігінің қабылдау бөлімінің қызметкері. Киелі өнерді дәріптеп, қастерлей білген Хасенхановтар отбасы ауданымыздың мақтанышы. Торғайдың төл өнерінің дамуына үлес қосар осындай отбасылар көп болса игі.
Байбатыр Ахметбеков
Жанкелдин ауданы
