“Мен өмірді таңдаймын!”
Осындай атаумен облыстық Полиция департаментінің есірткі қылмысына қарсы іс-қимыл басқармасы мен “Қостанайдың жас көшбасшылары” қоғамдық бірлестігінің ұйымдастыруымен кең көлемді акция өткізілді. 26 маусым – халықаралық нашақорлықпен күрес күні қарсаңында өткізілген бұл шараға аула клубтарынан үш жүзге жуық бала қатысты.
Негізгі мақсат – жасөспірімдер арасында жаман әдеттердің алдын алып, салауатты өмір салтын қалыптастыру. Шара аясында түрлі спорттық ойындардан жарыстар өтіп, концерттік бағдарламаға ұласты.
Сондай-ақ, департаменттің арнайы жедел әрекет ету жасағының өкілдері сөз сөйлеп, өздерінің құқық бұзушыларды ұстау кезіндегі әрекет-тәсілдерін де көрсетті.
Ал, іс-шара соңында әр қатысушыға шоколадтар таратылды. Барлық командаларға грамоталар мен шағын кубоктар табыс етілді. Акция аясында ұйымдастырылған жарыстар қорытындысы бойынша “Күн балалары” атты команда жеңімпаз атанды.
-Нашақорлық – әлеуметке ортақ проблема. Жер бетіне миллиондаған өмірлерді алып кетіп жатқан бұл ауру әлемдік трагедия, өз ауқымы жағынан дүниежүзілік соғыстармен тең десе де болады. Халықаралық нашақорлықпен күрес күні қарсаңында өткізіліп жатқан мұндай шаралардың маңызы өте зор. Себебі, бүгінгі өсіп келе жатқан ұрпақ ғасыр індетінің зияны туралы біліп өсуі керек, оларды біз үлкендер жаман әдеттерден қорғап, алдын алуымыз керек. Оқушылардың жазғы демалыстарында біз осындай шараларды көптеп өткізуге тырысамыз. Келесі аптада Бакиров атындағы сауықтыру лагеріне баруды да жоспарлап отырмыз, – дейді есірткі қылмысына қарсы іс-қимыл басқармасының жедел уәкілі Айгүл Ераділова.
