Ештен кеш жақсы
Рудныйда қалалық ардагерлер кеңесінің мүшелері мемлекеттік тіл курстарын тәмамдап шықты.
Зейнеткерлер қазақ тілін үйренуге өздері ниет білдіріп, әкімдіктегі тілдерді оқыту орталығының көмегіне жүгінген. Игі бастаманы кеңестің төрағасы Сәлімгерей Бексейітов те қос қолдап қолдады.
– Тіл үйрену ешқашан да кеш емес. Бір жағынан, орталықтың білікті мамандарына деген жұрттың көзқарасы жақсы. Мұнда жүздеген мемлекеттік қызметкерлер, құқық қорғау органдарының өкілдері мен кәсіпкерлер тілді емін-еркін меңгеріп алуға мүмкіндік алды, – дейді ол.
Ардагерлер партаға өткен жылдың желтоқсанында отырған болатын. Олар педагог Әсел Исмайылованың жетекшілігімен лексика мен грамматиканы үйреніп қана қоймай, қазақ халқының салт-дәстүрлерімен тереңірек танысып, халық әндері мен ҚР мемлекеттік әнұранын жатқа айтты.
Енді, міне, қысқартылған курстың аяқталар уақыты да келіп жетті. Бүгін орталықта осы оқиғаға орай «Тілі бірдің – тілегі бір!» атты іс-шара ұйымдастырылып, «алтын жасты» ардагерлерге арнайы сертификаттар салтанатты түрде табысталды.
Қуаныш Есқабыл
