Мінсіз мылтық миллион тұрады
«ССКӨБ» АҚ Рудныйдағы спорттық оқ атуды жаңғыртпақ. Өткен жылы кәсіпорын Қостанай облысы әкімдігі мен Еуразиялық Топ арасындағы меморандумға сәйкес мергендер клубына лақтырғыш машинасын сатып әперді. Сондай-ақ, олардың дайындалатын жалғыз орнын – №14 мектебіне күрделі жөндеу жүргізіліп, заманауи үлгіде жабдықталды. Енді, міне, көптен күткен бесатар мылтыққа да жол жетіп отыр.
– Немістің Feinwerkbau 800 маркалы қаруы 1 млн теңге тұрады. Оның жоғары сапасы мен мінсіз дәлдігі, әсіресе, Олимпиада спортшыларының арасында ерекше бағаланады. Қостанай аймағында осындай мылтық бізде ғана бар. Енді спорттағы жетістіктерімізді еселей түсу ғана қалды, – дейді облыстық Спорттық ату федерациясының директоры Леонид Буторин.
Жаттықтырушы спорттың осы түріне үнемі қолдау көрсетіп келе жатқан кен алыбының басшылығына зор алғысын айтады.
Қуаныш ЕСҚАБЫЛ
