«Өнерге бас иемін»
Әнші, халықаралық байқаулардың жеңімпазы Манапбек Кәдіровтің 50 жасқа толған мерейтойына орай осындай атаумен шығармашылық концерті өтті. Қазақтың ән өнерінің дүлдүлдері Жәнібек Кәрменов, Қайрат Байбосыновтардың алдын көрген дарын иесі бүгінде өзіндік мектеп қалыптастырып, шәкірт баулыған үлкен ұстазға айналды. Ширек ғасыр Е.Өмірзақов атындағы Қостанай облыстық филармониясында еңбек етіп келе жатқан Манапбек Сапарбайұлы талай байқауларда топ жарып келеді. Киелі сахнаның қыр-сырын әбден меңгерген маман бүгін.
«Ғазиздің әні», «Екі жирен», «Жиырма бес», «Мұхида-Шайбан», «Самалтау», «Иманжүсіптің әні», Нартайдың термесі, «Молдабайдың әні», «Жігіттерге өсиет», «Көкен-ай» бастаған Арқа, Жетісу, Сыр, Алтай-Тарбағатай деп ән талғамайтын Мәкеңнің орындауындағы Кененнің «Көкшолағы» – оның көзірі іспеттес. Бұлардан бөлек, жергілікті ақын-сазгерлердің де шығармаларын нәшіне келтіріп орындап жүр. Ақын Серікбай Оспановтың сөзіне жазылған Сапар Молдабековтің "Домбыра" әні соған айғақ.
Кеш иесінің шашбауын көтере келген өнердегі әріптестері мен шәкірттері аз емес. Жерлесіміз, танымал сазгер Қалибек Деріпсалдин, Астанадан арнайы келген белгілі әнші, Қазақстанның мәдениет қайраткері Толғанбай Сембаев, Қаратау мектебінің көрнекті өкілі, шертпе күйдің шебері Сәрсенғали Жүзбаев, Манапбектің туған інісі, әнші Жанатбек Кәдіров, филармония әншісі Талғат Молдағалиевтер әннен-күйден шашу шашты.
– Манап Арқа, Жетісу, Сыр, Шығыс деп ән талғамайтын ерекше дарын иесі. Бүгінгі шығармашылық кеш өте жоғары деңгейде өтті. Кеш иесі барлық шығармаларын бір деммен орындап шықты. Көп жағдайда әншілердің дыбыс, демдік күші жетпей жататын кез болады. Манаптың бұл тұрғыда өте мықты дайындығы көрініп тұр, – деді Т.Сембаев.
Кеште облыстық мәдениет басқармасының басшысы Ерлан Қалмақов мерейтой иесіне шалқар шабыт тілеп, аймақ басшысының алғыс хатын табыс етті. Ал Манапбектей інісінің өнеріне тәнті ел ақсақалы Тарғын Әбенов иығына шапан жауып, ақ батасын берді.
Манапбек Кәдіров – біздің газетіміздің нағыз жанашыры. Басылым ұйымдастырған талай сапарларда бірге жүріп, өнерін ортаға салып келе жатыр. Кеш иесіне шығармашылық табыс газеттің бас редакторы Жанұзақ Аязбеков «Қостанай таңы» газетінің жанашыры» дипломын табыстап, иығына шапан жапты.
Қыдырбек ҚИЫСХАНҰЛЫ
Суреттерді түсірген Б.Көркембаев.
