Іздеу салынады!
Полицейлер 18 жастағы Дарья Махартованың өліміне қатысы болуы ықтимал күдіктіні іздестіруде. Тәртіп сақшыларының дерегіне сүйенсек, ол 20-30 жас аралығындағы ер адам. Үстіне ақ жейде, ала қысқа шалбар киген. Облыстық ІІД баспасөз қызметі күдіктінің болжамды суретін жариялады.
Еске сала кетейік, 20 шілдеде Қостанай облысының Затобол кентінде 18 жастағы Дарья Махартова із-түссіз жоғалып кеткен болатын. Сол күні барлық полицейлер сағат 22.00-ден 23.00 аралығында Қостанай-Затобол тас жолы арқылы өтетін жүргізушілерден автокөліктердің бейнетіркеу құрылғыларының таспаларын тексерді. Өкінішке қарай, ертеңіне оның денесі Қостанай қаласының іргесіндегі орманнан табылды. ҚР ҚК-нің 99-бабы ("Кісі өлтіру") бойынша сотқа дейінгі тергеп-тексеру амалдары басталды. Жедел іздестіру шаралары жүргізіліп жатыр.
Күдіктіге немесе оқиғаға қатысты қандай да бір дерегі бар адамдардан 102, 52-60-21, 52-60-22, 52-60-54 нөмірлеріне дереу қоңырау шалу сұралады.
