120 отбасыға пәтер кілті тапсырылды
Астана күні мерекесінде пәтер кілтіне ие болғандардың қуанышына облыс әкімі Архимед Мұхамбетов ортақтасты. «Әуежай» шағын ауданындағы №23-24, №25-26, №30-31 тұрғын үйлер пайдалануға беріліп, 120 отбасы пәтер кілтіне ие болды. Баспана құрылысы «Нұрлы жер» бағдарламасы аясында жүзеге асқан. 
Мұнда пәтер кезегінде тұрған мемлекеттік қызметкерлер мен халықтың әлеуметтік тұрғыда әлсіз топтары өкілдері қоныстанбақ. Салтанатты шарада тұрғындарды құттықтаған облыс әкімі қуаныш иелеріне көптен күткен пәтер кілтін табыстады.
– Бүгін, міне, үлкен шаттыққа кенеліп отырмыз. Мемлекет басшысы ұсынған бағдарламаның арқасында халық басыбайлы баспанаға ие болды. Осы қарқынмен Қостанайды одан әрі гүлдендіріп, кеңейте түсеміз. Қазірдің өзінде «Береке» шағын ауданындағы тұрғын үй құрылысының жобалық-сметалық құжаттары әзір. Жоспар бойынша биыл «Әуежай» мөлтек ауданында 47 пәтер қолданысқа беріледі. «Юбилейный» шағын ауданында 52 үй өз иелерін күтеді, – деді Архимед Мұхамбетов.
Пәтер кілтіне ие болғандардың қатарында спорттық биден әлем чемпионатының жүлдегері Мәлика Мұхтарова да бар. Өз кезегінде ол мемлекеттің жастарды жан-жақты қолдау көрсетіп жатқанын айтты. 
Қасқырбай Қойшыманов
Суреттерді түсірген Бағдат Ахметбеков
