Қайта айналып соғар ем БУРАБАЙҒА
Вокзал іші ығы-жығы. Жо-лаушылардың бірі келіп, бірі кетіп жатыр. Біз Қостанай-Қарағанды бағытындағы пое-здға жайғастық. Бағытымыз-Бурабай. Жер жәннаты атанған Көкшетауды көруге құмартып келеміз. Бір жағынан республикамыздың түкпір-түкпірінен жиналатын жастармен сұхбаттасуға асықтық.
Бұл жолғы сапардың жөні бөлек. Себебі, бір апта бойы лагерьде боламыз. Көкшедегі жастардың кездесуіне "Қазақстандық шығармашыл әйелдер одағы" ҚБ мұрындық болып отыр. Аталмыш ұйым биыл алғаш рет республикамыздың әр аймағындағы шығармашыл жастардың басын қосуды жөн көрген екен. Яғни, әр облыстан 2l-30 жас аралығындағы азаматтарды шақырып отыр. Қостанай облысынан үш адам бардық. Олар, Лисаков қаласындағы жергілікті телеарнаның тілшісі Диана Лизунова, Рудныйдағы мәдениет үйінің өнерпазы Рақымжан Ералы және мен.
Түнделетіп межелі жерге де жеттік. Вокзалдың алдында таксишілер толып тұр. Соған қарағанда мұндағы халықтың кәсібі көлік жүргізіп, туристерге қызмет көрсету деп топшыладық. Шындығында да солай екен. Біз мінген таксидің жүргізушісі Бурабайдың тұрмысы туралы азды-көпті баяндаған еді. Бұл жер туризм ошағы болғандықтан өндіріс орындары жоқ. Бірақ, қадам басқан сайын қонақ үй, лагерь, демалыс базаларын кездестіресіз.
Жасы кіші демеңіз ақылы асса
Аталмыш жоба "Менің бақ-дәулетім-қуатты Қазақстан" деп аталады. Оның жетекшісі-Айсұлу Тани. Ұйымдастырушының айтуы бойынша, басты мақсат шығармашылықпен айналысып жүрген өрендерге көңіл бөліп, қолдау білдіру. Осы мақсатта еліміздің әр жерінен он сегіз қатысушы іріктеліп алынған екен. Таңдаулылардың арасында жас композиторлар, ақындар, суретшілер, бишілер, тілшілер бар. Лагерьдің ашылу салтанатында әрбір қатысушы туралы толық мәлімет айтылды. Жас та болса бас болып жүрген замандастарды көріп тәнті болады екенсің. Мәселен, алматылық Ақерке Бағдат-қызы. Ол Әл-Фараби атындағы Қазақ Ұлттық Университетін аудармашы мамандығы бойынша тәмамдаған. Корей тіліне жетік. Білімін әрі қарай дамыту үшін Оңтүстік Корея, Сеул, Ёнъчиндегі Kangnam University оқу орында бір семестр оқыған. Қазіргі күні Алматыдағы корей фирмасында менеджер-аудармашы болып жұмыс істеуде. Бос уақытында Кореядағы XXI ғасыр ақындарының поэзиясын қазақшалайды. Ақеркенің айтуынша, корей тілі мен қазақ тілі ұқсас келеді екен. Сондай-ақ қазақша сөйлейтін адам корей тілін тез үйрене алады. Себебі, қос ұлттың тілінде ң, ө деген әріптер ұқсас.
Жезқазғандық Ернұр Сейдахметовты көрсеңіз тіптен риза боласыз. Себебі, ол "Қазақмыс" корпорациясында инженер болып жұмыс істеп жүрген жас ақын. Балаларға арнап өлең жазады. Ернұрдың "Қашан үлкен боламын?", "Тентек доп" атты кітабы жарыққа шықққан. Бізде балаларға арнап жазатын ақын-жазушылар санаулы ғой. Санаулының ішінде саф алтындай жарқырасам деген Ернұрдың талабына бәрекелді дейсің.
Арқаның інжу-маржаны
Лагерьде жүріп таңның атуы мен күннің батуын аңғармай қалады екенсің. Себебі, күн сайын түрлі тақырыпта тренингтар өтті. Жоба тренерлерінің ішінде Гүлзи Нәби, Гүлниза Баталова, Ләйлә Сұлтанқызы, Гүлмира Сұлтанбекова, Юрий Толочко, Гүлмира Ордабаева, Гүлшат Құттыбекова бар. Аталған мамандар өз салалары бойынша білгендерімен бөлісті. Тренерлердің көмегімен топ алдында көсіле сөйлеуді, ән айту барысында дұрыс демалуды, сурет салуды үйреніп, қазақ халқының би қимылдарының тарихы туралы ақпаратқа қанық болдық. Бір аптаның ішінде боймен бірге ой сергіді.
Экскурсия барысында Бурабайдың тұмса табиғатын тамашалап, тамсандық. Керім десе керім-ау, шіркін. Табиғаттың шеберлігіне таң қалмасқа лажың жоқ. Айнала жап -жасыл. Төңіректе қаптаған балқарағай мен биші қайың. Таулары көкпен таласа, анадайдан менмұңдалайды. Қиыршық тастарды құдды бір кранмен қойып, әр бұрышын қашап дәл қиюластырған ба деп қаласыз. Себебі, артық тұрған оғаш дүниені аңғару қиын. Мұндағы тау мен тас, өзен-көлі көне тарихтан сыр шертеді. Жанына жақын барып, құлақ түрсең сайрай жөнеледі. Ол жердің әр қуысы жұмбақ. Қарап тұрып бас мүлгисің. Оқжетпестің басында тізе бүгіп жатқан пілдің бейнесін көресіз. Ал Жұмбақтасты бір қырынан қарасаң бұрымды қыз, екінші қырынан қарасаң егде тартқан кемпірдің сұлбасын байқайсыз. Жеке батыр жотасында шалқайып жатқан батырдың бет әлпетін аңғаруға болады. Осынау таңғажайып табиғатты Біржан сал, Ақан сері, Шоқан Уәлиханов,Үкілі Ыбырай, Балуан Шолақ сынды бабаларымыз тамашалаған.
Қымбат ДОСЖАНОВА
