Рудныйда скейт парк салынуда

Өткен жылы кеншілер қаласының бір топ белсенді жастарының өтінішіне орай «ССКӨБ» АҚ президенті Береке Мұхаметқалиев скейт саябағын салып беруді уәде еткен болатын. Міне, биыл уәде орындалып, 13 мамырдан бастап қаланың орталық алаңында шағын саябақтың құрылысы басталды.

Бүгінде алматылық «Sporttech Kazakhstan» ЖШС мердігер компаниясының конструкторлары мен жұмысшылары памп-трек (төбелі және еңіс келетін арнайы велосипед жолағы) зонасының 68 блогын жинап, онымен бір уақытта скейт алаңын жасақтап жатыр.

– Бірнеше алаңшадан тұратын мұндай үлкен жобамен біз бірінші рет жұмыс істеп отырмыз. Бұрын бір ғана спорт түріне арналған жеке-жеке скейт саябақшаларын Алматы мен Петропавл қалаларына орнатқан едік. Аттракциондар негізгі бөлігі ағаштан жасалғандықтан жарақаттанудан сақтайды. Сондай-ақ, алаңшаға қауіпсіздік ережелері жазылған ескертпе тақтасын қоюды жоспарлап отырмыз, – дейді компания менеджері Мағжан Қайратұлы.

Айта кетейік, экстремалды спорт түрін жанына серік еткен рудныйлықтар скейт-саябақтың игілігін мамырдың 25-інен бастап көре алды.

 

Қуаныш ЕСҚАБЫЛ