ОЗАТ ОҚУШЫЛАР ОЛИМПИАДАСЫ
Қостанай қаласында қоғамдық-гуманитарлық пәндер бойынша республикалық олимпиада басталды. Ашылу салтанаты «Әуежай» шағын ауданындағы «Қостанай» спорт кешенінде өтті. Шараға Қостанай облысы әкімінің орынбасары Марат Жүндібаев қатысты.
– Мұндай ауқымды шараның Қостанай жерінде өтуі біз үшін зор мәртебе. Ыбырай мен Шоқан, Ахмет пен Бейімбеттің туған жеріне қош келдіңіздер! Бүгінде еліміздің білім берудің жаңа жүйесі қалыптасты. Оның ішінде, білім саласына цифрландыру бойынша бірнеше тың жоба енгізілді. Міне, өскелең ұрпаққа осындай тамаша мүмкіндіктер туып отыр, – деді Марат Жүндібаев. 
Қоғамдық-гуманитарлық пәндер олимпиадасына 602 қатысушы тіркелді. Сондай-ақ, қазылар алқасы құрамына еліміздің түкпір-түкпірінен 38 педагог шақыртылды. Олимпиада қаладағы №1 және №2 мектептердің базасында өтеді.
– Оқушылар қазақ және орыс филологиясы, Қазақстан тарихы, құқықтану бойынша өтеді. Нәтижесінде I, II, III дәрежелі дипломдарды иеленген шәкірттер білім гранты конкурсында айрықша құқыққа ие болады, – деді «Дарын» республикалық ғылыми-тәжірибелік орталығының директоры Шолпан Қирабаева.
Қасқырбай ҚОЙШЫМАНОВ,
Суретті түсірген Бағдат Ахметбеков.
