Қош келдің, әз Наурыз!
Алтын астықты арқа өңірі биыл Ұлыстың ұлы күнін жылдағыдан айрықша қарсы алуда. Қаланың ықшам аудандарына киіз үйлер тігіліп, мерекеге жиылған халыққа тегін тамақ таратылып, арқа-жарқа молшылықтың лебі есуде.
Қаланың мәдениет ошақтары, ауылдық елді мекендер жаңару күнін ел арасында насихаттауды ерте бастан қолға алып кеткен. Мереке жақындаған сайын ауқымы да кеңейе түсуде.
Соның бір жарқын көрінісіндей болып, 20 наурыз күні сағат 10.00-де А.Байтұрсынов алаңқайы аталатын қаланың №6 ықшам ауданындағы «Oмкa» базары және №2 ықашам аудандағы облыстық "Дала өлкесі тарихы" музейінің алдында мерекеге арналып, жалпыхалықтық мәдени-көпшілік шаралар ұйымдастырылды.
Ұлттық нақыш өрнегін салған сауықтық шараларда қонақжай халқымыздың салт дәстүрі көрініс тауып, киелі өнері өрістеді. Сауда – саттық жәрмеңкесі ұйымдастырылып, спорттық шаралар жанкүйерлерін жанына көптеп жинады.
Мерекеге жиналған халықты қала әкімі Амантай Балғарин құттықтап, қала әкімінің орынбасары Түбекбай Әубәкіров мерейлі еңбек иелеріне қала әкімінің алғыс хатын табыс етті.
Қала тұрғындарының қуанышын еселеген ұлық мерекеге қала мекемелері мен ұжымдары бір кісідей жұмылып, тік тұрып қызмет көрсетті.
Елдің ынтымағын арттырып, еңбекке деген құлшынысын оятқан ізгілікті шаралар таяуда орталық "Наурыз" алаңында мәресіне жетпек.
Мұрат Жүнісұлы
Суреттерді түсірген автор
Арқалық қаласы.
