Наурыз шақырады!
Қостанай қалалық әкімдігі тұрғындар мен қала қонақтарын Наурыз мейрамына арналған іс-шараларға қатысуға шақырады. 21, 22 және 23 наурызға жоспарланған мерекелік бағдарламалар тізбегі төмендегідей:
21 наурыз.
– "Арғымақ" атшабарында (Заречный а.) ат спортынан сайыстар өтеді. Бағдарламаға сәйкес, бәйге (3 шақырым), аламан бәйге (7 шақырым), сондай-ақ, "аударыспақ", "арқан тарту", "қой көтеру" сияқты қазақтың ұлттық ойындары ұйымдастырылады. Аталған сайыстарға басқа да облыстардың өкілдері қатысады;
– Қаламыздың сауда орталықтары көрермендерге арнап ұтыс ойындарын өткізеді.
22 наурыз.
– Қостанай қаласының орталық алаңындағы мереке "Наурыз шақырады!" театрландырылған көрсетілімімен басталады;
– Концерттік шараларда облысқа белгілі өнерпаздар өнер көрсетеді;
– Алаңға жағалай қондырылатын киіз үй ауылы әр ұлттың салт-дәстүрлерімен танысамын деушілерге өз есігін ашады;
– Аспаздар палау пен бауырсақ дайындаудан сайысқа түседі және сайыс соңында кез келген адам дәм тата алады.
23 наурыз.
– "Мирас" мәдениет сарайында "Пай, пай, қазақтың келіндері-ай!" атты келіндер сайысы өтеді.
Сондай-ақ, осыған дейін жазғанымыздай, 21-22 наурызда І.Омаров атындағы қазақ драма театрында жастарға арналған "Бастаңғы" мерекелік думаны салтанат құрады.
Естеріңізге сала кетейік, Наурыз мейрамында қазақстандықтар 5 күн қатарынан, яғни 21-нен 25-не дейін демалады.
