Мерекелік мотошоу
Қостанай қаласының туған күнін мерекелеу мото-фристайл шоуымен басталды. Көпшілікті таң қалдырған шоу Орталық стадионда өтті.
Бұл күні стадионға ағылған адамның санын тауып айту қиын. Себебі, шоу көруге жиналған жұрттың қарасы қалың. Көрермендердің алғашқы легі кешкі сағат жетіден бастап келіп, өз орындарына жайғасты. Кіру ақылы болғанына қарамастан келушінің қатары сиремеді. Стадионның қос трибунасы лық толды. Екі аяқтан тік тұрып тамашалағандары қаншама.
Мотошоу басталмас бұрын концерттік бағдарлама ұсынылды. Жергілікті өнерпаздар ән салып, би биледі. Ұлттық киімдегі қыздар шашу шашып, спортшылар да өз өнерлерін паш етті.
Көңілді концерттен кейін қостанайлық байкерлер ортаға шығып, стадионды шыр көбелек айналды. Әртүрлі үлгідегі мотоцикл мінген спортшыларға қарап тәнті боласың. Көршілес Ресейден шақырылған Adrenaline Rush Ferz командасының қойылымы тіптен қызық. Шетелдік спортшылар мотоциклдерімен әуеде қалықтап, таң қалдырар трюктарды жасады.
Қымбат Досжанова
Суретті түсірген Айбек Жүзбай
