Медет Арқалықта ән шырқады
Арқалықтағы облыстық қазақ жасөспірімдер театрында "Жас қанат – 2000" республикалық байқауының лауреаты, қазақ эстрадасының бүгінгі жарық жұлдыздарының бірі – Медет Шайкелов жерлестеріне өзінің"Сағыныш" атты ән кешін ұсынды.
Халқының ән өнерін паш еткен әуезді әншіні өзбек, қырғыз, қытай, маңғолия, түркия елдерінің өнер сүйер қауымы "Қазақтың Тарканы" деп таниды. Ол қайырымдылық шараларына жиі қатысып, қарттар мен балалар үйіне жәрдемдесумен де ел арасына кеңінен танылған жан.
"Биле достар", "Түн", "Жұмбақ қыз", "Жас жігіт" сынды ел арасында зор танымалдыққа ие бейнебаяндары мен үнтаспаларын шығарған әнші кешінде репертуарындағы әндерімен қатар сиясы кеппеген жаңа әндерді де көптеп шырқады.
– Шығармашылық жолда жүріп, елге келмегеніме бес жылдың жүзі болыпты. Елдің ыстық ықыласына көп рахмет. Амандық болса алдағы күзде әріптестеріммен бірге тағы да келмекшімін, -дейді үнемі жайдары кейіпте жүретін бауырымыз.
Жасампаз әнші жақында екінші ән жинағын жарыққа шығармақ. Сондай – ақ, Астана қаласында жеке концертін өткізуге де қамданып жүр екен.
Мұрат Жүнісұлы
Арқалық қаласы
