Мобильдік орталық Сарыкөлде болды
«Бизнестің жол картасы – 2020» мемлекеттік бағдарламасы бойынша кәсіпкерлікті қолдаудың мобильдік орталығы Сарыкөл ауданына арнайы келді. Аудандық кәсіпкерлік бөлімінің өтініші бойынша келген мамандар аудан кәсіпкерлері мен жаңа ғана кәсібінің көкжиегін кеңейтуге кіріскендердің көкейтесті сауалдары бойынша тегін қызмет көрсетіп, келелі кеңестер берді.
Таңертеңнен түске дейін аудан тұрғындары осы орталыққа қарай ағылды. Аталмыш орталықтың заңгер, сервистік компания қызметкері, кеңесші және менеджмент сынды өз ісінің мамандарынан мейлінше мәліметтер алды. Мұнда келушілерге қызмет көрсеткендердің бірі – менеджер Рмазан Бірмағамбетов. Оның айтуынша, бұл орталық ауданға осымен 3-ші рет келіп отыр. Алдағы уақытта тағы да 2 рет келіп, кәсіпкерлікті қолдауға бағытталған барлық мемлекеттік бағдарламалар бойынша ақпараттандыру жұмыстарын жүргізбек ниетте.
Сондай-ақ, түс ауа аталмыш орталықтың сапары Сорочин ауылдық округінде жалғасты.
Руслан Әлкеев
Сарыкөл ауданы
