Отан қорғаны – Ұлттық ұлан (ФОТОРЕПОРТАЖ)

Қостанай қаласындағы "Мирас" мәдениет үйінде ҚР Ұлттық ұланының құрылғанына 26 жыл толуына байланысты салтанатты іс-шара өтті. Оны облыс орталығында орналасқан 6697 әскери бөлімі ұйымдастырды.

 

Елбасы Н.Назарбаев Тәуелсіздік алғаннан кейінгі құқықтық тәртіпті қамтамасыз етуге екпін бере отырып, егемендік декларациясы жарияланған соң, небәрі 26 күннен кейін мемлекеттегі алғашқы күш-қуат органы ретінде Ішкі әскерді құрған еді. Яғни Ұлттық ұланның жауынгерлік тарихы сонау 1992 жылдың 10 қаңтарынан бастау алады. Аттай 26 жыл бедерінде жеке құрам тиесілі міндеттерін мүлтіксіз орындай білді. Азаматтардың конституциялық құқығын, қауіпсіздігін, қоғам құндылықтарын, ел тұрақтылығы мен тыныштығын қауіп-қатерден қору жолында абыройлы қызмет атқарып келеді. Мұны қала әкімі Б.Жақыповтың құттықтауын жеткізген орынбасары Айдар Құсайынов тілге тиек етіп, кәсіби мереке иелеріне алғыс білдірді.

Бүкіл ел бойынша мерекеленіп отырған атаулы күнде Ұлттық ұланның Қостанайдағы 6697 әскери бөлімінің жемісті де мерейлі қызметі жайлы бөлім командирі майор Ерлан Ипатов баяндама жасады.

-Осы жылдар ішінде мінсіз қызметі үшін 200-ден астам мемлекеттік қызметкер марапатқа ие болды. Соның ішінде 45 жауынгер ҚР президенті қолынан ордендермен марапатталды. Бұл Отанның қауіпсіздігін қамсыздандырушы ішкі әсердің мүлтіксіз қызметінен хабар береді. Жеке құрамның табанды да табысты қызметін бір баяндамаға сыйғызып айту мүмкін емес. Ұлттық ұлан құқықтық тәртіпті сақтауды жалғастыра бермек, – деді Е.Ипатов.

 

Шара барысында еңбегі елеулі жауынгерлер алғыс хаттарымен марапатталды. Кәсіби мерекеге жиылғандарға арналып ән мен күйден шашу шашылды. Әскери оркестр мен өңір өнерпаздары мейрамның көркін келтірді.

 

Суреттерді түсірген Бағдат Төлебай