Техника жеткілікті

Күзгі жиын-терімді сапалы өткізу көп жағдайда техниканың әзірлігіне және шаруашылықтарды жанар-жағар маймен жеткілікті қамтамасыз етуге тікелей байланысты. Облыстық ауылшаруашылығы басқармасының басшысы Б.Мурзиннің мәлімдеуінше, биылғы егін ору науқанында 11,4 мың астық жинайтын комбаиндар жұмыс істемек. Оның 3 мыңы "Джон-Дир", "Кейс", "Клаас", "Акрос" тәрізді жоғары өнімді техникалар. Мұндай шетелдік комбаиндардың жұмыс өнімділігі екі есе жоғары.

Қазіргі таңда трактор паркі 99%, комбаиндар 95% және қырмандар 95% әзір. Тек Аманкелді және Таран аудандарында астық жинайтын комбаиндардың дайындығы облыстық орташа көрсеткіштен төмен. 15 тамызға қарай барлық қажетті техникалар  әзірлік сапына қойылатын болады. "Егер   ауа-райы қолайлы болып тұрса, онда 20-25 күн ішінде орақ науқанын толық аяқтауға болады. Оған техниканың мүмкіндігі де, жанар-жағар май да жеткілікті", – дейді Б.Мурзин.