«Үздік мемлекеттік қызметші-2017»

Міне, осындай атпен облысымызда  Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Қостанай облысы бойынша департаменті және «Мемлекеттік, банк мемекемелері, қоғамдық қызмет көрсету қызметшілерінің салалық кәсіподағы» қоғамдық бірлестігінің Қостанай облыстық филиалының ұйымдастыруымен байқау болып өтті.Елбасымыз ұсынған Ұлт жоспары «100 нақты қадамның» он бес қадамы кәсіби мемлекеттік аппаратты құру мен мемлекеттік қызметшілердің біліктілігін арттыруға, олардың мәртебесін қалыптастырып, мемлекеттік қызмет жүйесін жоғары деңгейге көтеруге бағытталып отыр.-Сондықтан да  өткізіліп отырылған байқаудың басты мақсаты- мемлекеттік қызметтің беделін көтеру, мықты  мемлекеттік аппарат қалыптастыруға қадам басу.  Біз барлығымыз халықтың қызметшілеріміз, сол себепті де қызметшілердің міндеті- халқыққа қызмет көрсету болып табылады. Мемлекеттік қызметші болғандықтан, ол қандай болуға тиіс? Біліктілігімен қатар білімі де жан-жақты, зияткерлігі де жоғары болуы керек. Ол өзіне жүктелген міндетті атқарып, заңдарды біліп қана қоймай, кез-келген сәтте ұтымды, ұтқыр, білікті бола білуі керек деп ойлаймын,-деді Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің Қостанай облысы бойынша департаментінің басшысы Берік Бекжанов.

Мемлекеттік қызметшілер байқауына  барлығы жиырма жеті бейнематериал келіп түсті. Әрбір материал сұрыптала келе он екі бейнематериалдың авторы яғни мемлекеттік қызметші байқауға жіберілді.

Байқаудың бағдарламасы бойынша «жеңімпаз атансам, өз-өзімді жан-жақты көрсете білсем» деген үмітпен  облысымыздың әр елдімекендеріндегі мемлекеттік мекемелерінен, органдарынан, департамент пен басқармалардан келген үміткер қызметшілер өздерінің шығармашылықтарын, шешендіктерін көрсетіп, заңнамаларға байланысты блиц-сұрақтарға жауап беріп, Қазақстанның тарихы мен мәдениетінен хабардар болулары қажет.

-Өзім Қарабалық ауданынан келдім. Мемлекеттік қызметшы болғаныма сегіз ай болды. Алматыдағы Сәтпаев атындағы ұлттық политехникалық университетті бітірдім. Мемлекеттік қызметте жүріп,  өзіме көп нәрсе  алдым, адамдармен сөйлесуді үйрендім,  біліктілігімді, шеберлігімді арттырдым. Ойыма көп нәрсе тоқи білдім. Осындай байқауға бірнші рет қатысып отырмын, сондықтан жеңімпаз болмасам да  басқа да өзім сияқты әріптестерімді көріп, олардан білмегенімді үйреніп, тәжірибе жинақтаймын деп ойлаймын,-деді қарабалықтық  жас мемлекеттік қызметші  Дінмұхамед Асылбеков. Байқаудың үй тапсырмасында  мемлекеттік қызметшілер өздерінің шығармашылықтарын көрсете білді. Бірі ән шырқаса, екіншісі жыр оқыды, үшіншісі эссе айтты, тағы бірі домбырамен күй шертті, енді  бірі  мың бұралып биледі. Ал, пікірталас кезеңінде берілген    тиісті уақытта  тақырыпты  деректер келтіре отырып  мазмұнын ашып я болмаса сол деректермен керісінше жауап берулері керек-ті. Бұл кезеңде мемлекеттік қызметшілер ең алдымен білімділіктері мен шешендіктерін көрсетулері қажет болды. Әр қатысушы бір кезеңінде аз ұпай алса, ал, келесі кезеңінде жоғары ұпайға ие болып жатты. Қаншалықты заңнамаларды білетіндіктерін де көрсетті.  Әр кезеңде  жиналған көрермен қауым да, жанкүйерлер де оларға қошемет көрсетіп, ду қол шапалақтап отырды. Сонымен, байқаудың қорытындысы бойынша  ең үздік мемлекеттік қызметші атағын сарыкөлдік мемлекеттік қызметші Есімбек Әуезханов жеңіп алды. Екінші мен үшінші орынға  қарасулық Мейрам Сауытбаев пен қостанайлық Айнұр Өтешова ие болды.

Гүлназым САҒИТОВА

Суретті түсірген Бағдат АХМЕТБЕКОВ