Жалындаған жастық шақ

by Qostanaı tańy · 17.06.2017

Облыс әкімдігі алдындағы алаңда мектеп бітіруші түлектерге арналған салтанатты шара өтті.

Салтанатқа жиналған мектеп бітіруші түлектердің – бозбала мен бойжеткендердің қай-қайсысы әсем де көркем. Киім киістері сәнді-салтанатты, көңілдері жайдары-жадыраңқы. Керемет. Жастарға бәрі де жарасымды. Әдемі шараны әсем муызыка да әрлеп тұрды. Енді жастардың алдарында өмірдің даңғыл жолы сайрап тұр.

Елімізде жастардың білім алуларына, еңбектенулеріне мүмкіндіктер мол. Мемлекет, атқарушы билік тарапынан барлық қолайлы жағдайлар жасалып отыр. Ал, салтанатқа жиналған ата-аналардың да, ұстаздардың да жүздері қуаныш пен мақтаныш сезімдеріне, құшақтары гүлге толы. Ауа райы да жадыраңқы, аспан ашық болды. Салтанат иелерін жүргізушілер ортаға шақыра отырып, әр мектептің оқу жылында жеткен жетістіктері мен табыстарын да жиналған қауымға жеткізді. Мектеп бітірушілерге арналған салтанатты облыс әкімі Архимед Мұхамбетов ашып, жиналған қауымды құттықтап, өзінің ізгі тілегін тіледі.

–Қадірлі мектеп бітіруші түлектер, ұстаздар, ата-аналар! Барлықтарыңызды бүгінгі салтанат күнімен құттықтаймын. Жас түлектер, бүгінде сіздер білім шыңдарын бағындыра отырып, қуанышы мен қызығы мол мектепті қалдырып отырсыздар. Алдарыңызда үлкен жол тұр. Елбасымыз өзінің «Болашаққа бағдар: рухани жаңғыру» атты мақаласында: "Болашақта табысты болудың, бәсекелік қабілетті болудың басты себебі де білім", – деп атап көрсеткен болатын. Тобыл-Торғай өңірі білім мен ғылым саласын дамытуға аса көңіл бөледі. Себебі оның бастауында ұлы ұстаз Ы. Алтынсарин тұр. Ол алғаш рет балаларға арнап мектеп ашты. Біздің мектеп түлектері биыл жаңа форматтағы қорытынды емтихан тапсырды, енді ҰБТ тұр. Білім сынағын жақсы тапсырады деп ойлаймын,-деді облыс әкімі.

Содан кейін өз сөзінде аймақ басшысы облысымыздағы мектеп оқушыларының оқу жылында жеткен жетістіктері мен табыстарын қысқаша айтып өтті. Ұстаздар мен ата-аналарды құттықтады. Сол секілді салтанат барысында облыс әкімі «Алтын белгі» иелерін құттықтап, оларға марапат белгілерін табыстады. Осы арада айта кеткеніміз жөн, үстіміздегі оқу жылында мектеп бітіруші түлектердің саны төрт мыңнан асады. Олардың 113-і – «Алтын белгі» иегерлері. Ал, Қостанай қаласындағы «Алтын белгіге» үміткерлердің саны – он бес. Облыс әкімі қолынан «Алтын белгі» марапатын алғандардың қатарында С.Мәуленов атындағы гимназияның, Ы. Алтынсарин атындағы дарынды балаларға арналған мектеп-интернатының түлектері де бар.