Қоржында – 10 медаль!

Жақында Көкшетауда қоян-қолтық ұрыстан Қазақстан чемпионаты өтті. Орал, Астана, Қостанай, Көкшетау, Тараз, Екібастұздан арнайы 17 команда келді. Қостанайлықтар бұл турнирге 13 спортшы апарды. Нәтиже жаман емес. Жалпыкомандалық есепте бірінші орын алды. Барлық жекпе-жек шеберлері жақсы өнер көрсетіп, 10 медаль еншіледі. Осы жарыста қарсыластарының бәрін ұтқан Кирилл Каяфа «Ең үздік спортшы» атағымен қоса, шебер әдіс-тәсілдер көрсеткені үшін марапатталды.

– Біз апарған балалардың барлығы 3-4 жекпе-жектен өткізді. Бұл турнирге тыңғылықты дайындалдық. Енді Азия чемпионатына дайындықты бастаймыз. Негізгі мақсат – үздік үштіктен көріну, – деді «Темірлан» спорттық-әскери клубының жетекшісі Руслан Сексенбаев.

Көкшетау татамиінде өткен додада өзінің жылдамдығымен, техникалық шеберлігімен ерекшеленген Әли Дидарұлы мен Александр Ольховский де білікті мамандардың жоғары бағасын алды.Республикалық турнирден іріктелген спортшылар Тәжікстанның Гулистон қаласында өтетін Азия чемпионатына қатысады. Байрақты бәсекеде 12-17 мамыр аралығында өтеді.

 

Қасқырбай Қойшыманов

Суреттерді түсірген Бағдат Ахметбеков