Мұз үстінде – әуесқойлар

Осы аптада әуесқой балықшылар сайысқа түсті. Жыл сайын өтетін қалалық турнирге 80-нен астам спортшы қатысты. Ұйымдастырушы – Қазақстан Республикасының спорттық балық аулау федерациясы. Басты мақсаты – қалада тұрып жатқан түрлі ұлт өкілдерінің бірлігін нығайту. Жарыс Аят өзенінде өткізілді. Күннің суықтығына қарамастан қармақ салуға келген спортшылардың бәрінің көңілі көтеріңкі.

– Қыстыгүні балық аулау оңай шаруа емес. Шеберлік пен ептілікті қажет етеді. Турнирге келген барлық балықшылардың тәжірибесі мол, – деді Қостанай қаласының тұрғыны Ерлан Қабатаев.

Барлық қатысушылар талап бойынша өздерімен бірге балық аулайтын керек-жарақтарын алып келді. Мұз үстіндегі ойықтың арақашықтығы 5 метрден кем емес болды. Балық аулау 4 сағатқа созылды. Жеңімпаз – Ренат Ыстыбаев. Оның ұстап алған бірінші балығының салмағы – 210 грамм. Сүрен Байкин мен Батыр Көңкебаевтардың да қолы қапқыш екен. Жалпы гәтиже бойынша "Кеңарал" командасы бірінші орынды иеленді. Жекелей сында Рудныйдан келген әуесқой Владимир Порядченконың жолы болды.