Дубайдан чемпион болып оралды
6 жастағы Рамзан Байдәулетов Біріккен Араб Әмірліктерінде ментальды арифметикадан өткен халықаралық жарыстан жеңімпаз болып оралды. Зерек балғын бұған дейін облыстық, республикалық бәсекелерде төрешілердің таңдайын қақтырған еді.
![вундеркинд](https://old.kostanaytany.kz/wp-content/uploads/2016/11/vunderkind.jpg)
Жарыс Дубайда өтті. Кішкентай вундеркиндтің анасы Айгүл Аюпова айтқандай, ұғымтал ұл өз санаты бойынша алдына жан салмаған. Ол 8 минут ішінде 175 есеп шешіп үлгеріпті.
"Ол жерде бірнеше қос таңбалы есептер болды. Ұлым бәрінің шешімін тапты. Сандарды заматта орынды-орнына қоя алды. Былтыр біз ментальды арифметика академиясына оқуға барған болатынбыз, міне, нәтижесі!" – дейді анасы.
Рамзан бүгіндері мектепалды даярлық сыныбына барып жүр. Ол Қостанайдағы жылдам оқу мектебін ойдағыдай аяқтады. Балдырған кәсіби түрде шахматпен шұғылданады, 3 разряд алып үлгерген. Анасы ұлының есте сақтау қабілетінің аса мықты екенін айтады.
6 жасар чемпионға Индонезияда өтетін жарысқа қатысуға ұсыныс түсті. Енді ол 2017 жылдың желтоқсан айында Бали аралына бармақ.
Рамзанның балалық арманы бар – Президент шыршасына қатысқысы келеді.