Ішімдік ішем деп жалаңаш қалды
Рудный қаласының тұрғыны демалыс күндерін көңілді өткіземін деп жүріп, ұрылардың құрбаны болды.
Облыстық ішкі істер департаменті өкілінің мәлімдеуінше, оқиға 19 шілде күні түнгі сағат 2- де болыпты. Ішімдікке сылқия тойып алған 28 жасар қала тұрғыны үйіне жете алмай орталық көшелердің бірінде орналасқан аялдамадағы орындыққа қисайып, ұйқысын қандырмақ болады. Таңертең тәртіп сақшылары келіп оятқанда есін жиған азамат өзінің жалаң аяқ қалғанын және қымбат ұялы телефоны мен қалтасындағы ақшасының қолды болғанын аңғарады.
Жәбірленушінің арызы бойынша іске кіріскен полицейлер көп ұзамай ұйықтап қалған 28 жасар жігітті тонаған күдіктіні қолға түсіреді. Ол 38 жасар сол қаланың тұрғыны болып шықты. Күдіктіні тінту барысында қолды болған ұялы телефон тәркіленсе, аяқ киімді ұрының өзі киіп алғаны әшкере болды.
Мешіт Ғазиз
