Азаматтық ант үшін…
Бүгін Қостанайдағы Жеңіс саябағында 18 бозбала әскерге аттанды. Олар Қазақстан Республикасының мемлекеттік қорғаныс қызметінің қарулы күштер қатарына алынды. Бұл күннен бастап, азаматтар ҚР перзиденті мен ұлттық қауіпсіздік үшін қызмет ететін болады. Ел тыныштығын күзетуге аттанған жауынгерлерді әскерге шығарып салу рәсімін Қостанай қаласының Ішкі саясат басқармасы мен «Социум и Я» қоғамдық бірлестігі ұйымдастырып отыр.
Әскер қатарына алынған қостанайлықтарға, алдымен, қала әкімінің орынбасары Бибігүл Аққожина мен қалалық Қорғаныс істері жөніндегі басқарма басшысының орынбасары Асылбек Тибеков ақ жол тіледі.
-Әскерде жүріп отан алдындағы азаматтық борышыңды өтейсің. Сондай-ақ, жақындарыңның қауіпсіздігіне жауап бересің. Өмірлік тәжірибе жинап, шыңдала түсесіңдер. Әрбір ер азаматтың парызы бұл. Әлемдегі дағадрыстарға қарамастан, Елбасы біздің қорғанысты бекем ұстауда. Әскер қатарына алынған әр азаматтың саулығына жіті назар бөліп, әскер сапасын жыл сайын арттырып келеді. Мемлекет тарапынан көрсетілген осындай демеуді әр сарбаз сезінуі керек. Тәңір есен-амандығын берсін,-деді Б.Аққожина.
Сонымен қатар, Ауған ардагерлері кеңесі басқармасының мүшесі Мейрамбек Аманов пен жас сарбаздардың ата-аналарының атынан Елена Ткаченко өзінің зор мақтанышы мен ақжарма тілегін жеткізді. 
Жергілікті өнерпаздар жас сарбаздарға арнап ән-күйді төгілтті. Естелік суреттерге түсті. Іс-шара соңында Қостанай педагогикалық колледжінің студенттері жауынгерлерге әскерде пайдаға асатын тұрмыстық заттарға толы дорба үлестірді.
Суреттерді түсірген Айбек ЖҮЗБАЙ
