Әкім майдангерлерді құттықтады
Жаңа жыл қарсаңында 26 желтоқсан мен 30 желтоқсан аралығында Қазақстан Президентінің бүкіл еліміз бойынша Ұлы Отан соғысының ардагерлерін қолдау жөніндегі жалпыұлттық бірегей акциясы Қостанай ауданында да жалғасты. Аудан әкімі Тәуба Исабаев өзі бастап Затобол кентінде тұратын үш майдангердің шаңырақтарына барып, Елбасы Нұрсұлтан Назарбаевтың құттықтау хаты мен гүлі және аудан басшысының сыйлығын табыс етті.
Аудан әкімімен бірге қарт майдангерлердің тұрмыс-тіршілігін өңірдегі БАҚ өкілдері де көріп қайтты. Алдымен жасы тоқсанға келген Надежда Афанасьеваның үйіне барған әкім Мемлекет басшысының құттықтау хатын оқып берді. Гүл шоғы мен жаңа жылдық дастарханға апарған сыйлығын табыс етіп, ардагердің деніне саулық тіледі. Надежда Афанасьева қазір Затоболдағы «Нұр-Ай» шағын ауданының жаңадан салынған үйінің екі бөлмелі пәтерінде тұрып отыр. Бөлмелері кең, жарық, бастысы жылы екен. Қарт майдангер сүйенішпен жүрсе де, баспанасын өзі тазалап алады екен. аяқ астынан барған аудан басшылығына қуанышын жасыра алмаған қария алғысын жаудырып жатыр.
Сондай-ақ жасынан соғыстың ауыртпалығын көрген Алексей Комликтің үйінде болған Тәуба Исабаев қарт майдангерге зор денсаулық тіледі. Ардагер де алғысын айтып, амандық болса, алдағы Жеңістің 70 жылдығына баруға әзір екенін айтты.
Аудан басшысы өңірімізге аты мәлім Телғара Әбенов ақсақалдың отбасына барды. Тоқсанға аяқ басқан атаның әжемізбен отау құрғанына 65 жылға аяқ басыпты. Алты баладан бүгінде ұрпақ өрбіткен майдангер өзін құттықтаған барша жанға батасын берді:
– Мен Мемлекет басшысының Ұлы Отан соғысы ардагерлеріне ерекше көңіл бөлетініне разымын. Бұл өзім сияқты барша майдангердің тілеуі. Ал сіздерге біздің көрген бейнетімізді бермесін, жасымызды берсін. Өткен тарих қайталанбасын, еліміз тыныш болсын!
Қыдырбек Қиысқанұлы
