«Білімнің туын асқақтатқан ағартушы»
Міне, осындай атпен Ы. Алтынсарин атындағы облыстық мемориалдық мұражайда Ұлы ұстаздың туғанына 175 жыл толуына байланысты тағзым кеші болып өтті. Кешке облысымыздың білім, мәдениет саласының өкілдері, жоғары оқу орындарының профессор-оқытушылары, ыбырайтанушылар, ақын-жазушылар, білікті, ардақты педагогтар, студенттер, оқушылар қатысты.
-Жыл бойғы да, былайғы уақыттарда да жерлесіміз, ағартушы педагог, есімі білімнің шам шырағындай жарқырап тұратын Ы. Алтынсаринге арналған іс-шаралар өз жалғасын тауып, ұйымдастырыла беретіні сөзсіз. Биыл ұстаз атамыздың туғанына 175 жыл толып отыр. Өңірімізде мерейтойға арналып небір іс-шаралар өтті. Әрқайсысының өзіндік мәні, мағынасы, тағылымы бар. Ұстаздың келешек ұрпаққа айтқан өсиеті, қалдырған мұрасы, шығармалары, еңбектері баға жетпес байлық болып табылады. Тағзым кешінде Беген Көпеш, Қалқаман Жақып, Қуаныш Орманов секілді ыбырайтанушы ғалым ағаларымыз қатысып, өздерінің жыл лебіздерін білдіретін болады. 
Өткен ғасырда өмір сүріп, еліміздің бүгінгі келешек ұрпағына адамгершілік, еңбекқорлық, достық, өнер-білім туралы жазған ізгілік әңгімелері, білім алуға шағырған өлеңдері мән-мағынасын жоғатқан жоқ. Ыбырай атамыздың қай әңгімесін алмайық, «Мақта қыз», « Бай баласы мен жарлы баласы», «»Өрмекші, құмырсқа, қарлығаш» – барлығы да балаларымызды еңбектенуге, білім алуға, адалдыққа шақырады. «Кел, балалар оқылық» өлеңі ше? Халқының болашағына ден бойлап, қазақ балаларын білім алуға, кәсіп иесі болуларына үндейді,- деді мемориалдық мұражайдың қызметкері Шынар Досмағамбетова.
Кеш барысында «Ұлтымның ұлы ұстазы» бейнеролик аңызы аясында Қостанай мемлекеттік педагогикалық институтының қазақ тілі мен әдебиеті мамандығының «Балауса» әдеби үйірмесінің бір топ студенттері мен Қостанай қаласындағы №3 балабақша тәрбиеленушілері С.Көбеевтің «Орындалған арман» кітабының желісі бойынша шағын сахналық қойылым қойды. Сонымен бірге Ы. Алтынсариннің туғанына 175 жыл толуына арналған «Ардақтаймын атыңды құрмет тұтып» жыр сайысының жеңімпаздары, Қостанай қаласы мектептерінің оқушылары өздерінің авторлық өлеңдерін оқыды. Жиналған қауым ду қолшапалақтап қойылымды да, балғын жырларды да жылы қабылдады.
– Көптен бері институтымыздың қазақ және орыс филологиясы кафедрасының (декан-К.Есіркепова) қазақ тілі мен әдебиеті мамандығының «Балауса» әдеби үйірмесі Ы. Алтынсарин атындағы мемориалдық мұражаймен тығыз байланыста жұмыс істеп келеді. Үйірме мүшелері болашақ ұстаздар. Ыбырай атамыздың қай әңгімесі болмасын, өнер-білім алуды насихаттауға арналған мағынасы жағынан зор әңгімелермен қатар сахналауға, қойылым қоюға лайықталған шығарма деп те айтуға болады. Студенттеріміз Ы. Алтынсариннен білім алған, шәкірті болған Спандияр Көбеев атамыздың «Орындалған арман» романындағы өз аулында алғашқы мектеп ашылғанда ұстазбен қалай кездескені туралы әңгімесі желісінде қойылым қойды. Ал, балабақшаның балдырғандары білім алушы шәкірттерді ойнады. Үйірме мүшелері Ыбырай атамызға арналған барлық іс-шараларда қойылатын қойлымдарда, көрсетілетін, көріністерде ойнайды. Әрине, біз үшін үлкен абырой және ұстазға көрсеткен тағзымымыз,-деді үйірме жетекшісі Әлия Әбдірашова.
