Сынық омыртқамен қамауға алынды
Лисаковта 86 жастағы тұрғынның өз үйінен мүрдесі табылды. Кейін анықталғандай, марқұмды жуынатын бөлмесінде өлтіріп кеткен. Оны балғамен ұрып, жастықпен тұншықтырып, пышақ жұмсаған. Ауыр қылмысқа барған күдікті қолға түсті. 
"Тергеу нәтижесі бойынша, оның қолды қанға малуына пайдакүнемдік пиғылы себеп болған. Ол бұған дейін зейнеткердің пәтеріне жөндеу қызметін көрсетуге келіпті. Сол кезде қаскүнем марқұмның "қызметкермен" есептесер кезінде ақшаны қайдан алып жатқанын көрген… Ақыры құрбанының бар ақшасын қалтаға басыпты", – дейді Лисаков қаласының прокуроры Еркін Тайкешов.
Қылмыс жасаған соң ол үшінші қабаттың терезесінен секіріп кеткен. Сол кезде мас болса керек. Салдарынан омыртқасы екі жерден сынған.
Екі күн бойы сол сынған омыртқамен тығылып жатқан. Қазіргі уақытта ол жүре алмайды, тергеу изоляторының медициналық бөлімінде қамауда.
