Апат себептері анықталуда

27 шілде күні Қостанай облысындағы «Қайрақ» кедендік бекеті маңында ірі жол апаты болды. Салдарынан 30 адам жарақаттанып, 6 адам оқиға орнында жан тапсырған. Қаза тапқандардың арасында 12 жасар бала да бар. Жол-көлік оқиғасына қатысты облыстық ІІД-нің жергілікті полиция қызметі басшысының орынбасары, полиция майоры Құрмет Мәжікеновтің тілшілерге түсінік берді.Құрмет Кенжеханұлының айтуынша, жан түршігерлік оқиға сағат 17:40 шамасында болған. Алматы-Екатеринбург тас жолының 2103-ші шақырымында Ресей Федерациясына бет алған «Ивеко» жүк көлігінің алдыңғы сол жақ дөңгелегі істен шыққан. Рөлге ие бола алмаған жүргізуші қарсы бағытқа өтіп кетіп, жолаушылар тасымалдайтын «Челябі-Жітіқара» рейстік автобусына барып соғылады. Автобус жүргізушісі де, жүк көлігінің тізгіндеушісі де 30 жылдық тәжірбиесі бар білікті мамандар. Зерттеулер нәтижесі бойынша екеуі де ешқандай алкогольдік ішімдік пайдаланбаған. Зардап шеккендердің барлығын Қарабалық аудандық ауруханасына жеткізіп, тиісіті шараларды көрсеткен. Қаза тапқандардың екеуі РФ азаматы, үшеуі ҚР азаматы және тағы бір марқұмның жеке мәліметтері әлі нақтыланғани жоқ.

-Апатқа себеп – дөңгелектің істен шығуы. Жүргізушілердің бәрі тәжірибелі, екі ел арасында бұрыннан бері қатынап жүрген азаматтар. Соңғы он жылда біздің облыста мұндай ірі апат тіркелмеген. Тізгінге ие бола алмаған «Ивеко» жүк көлігі жүргізушісінің кінәсі айқындалса, 5 жылға бас бостандығынан айырылуы мүмкін. Оқиға орнынан 37 адам қауіпсіз жерге шығарылды. Қазір ол жерде құтқарушылар мен полиция қызметкерлері жүр. Жол апатының нақты себебін анықтау үшін бірқатар сараптамалар жүргізілуі керек,-деді Қ.Мәжікенов.

Қостанай облысының төтенше жағдайлар жөніндегі департаменті жол апатына байланысты жедел телефон желісін іске қосты. Телефон нөмері 8 (7142) 50-36-24. Сондай-ақ, жараланған адамдарға психологиялық көмек көрсетіп, қосымша ақпарат беру үшін 122 нөмірі жұмыс істейді.

 

Кенже ҚОНЫСБАЙ