Оттан абай болайық – алда жылыту маусымы!

Өңірімізде жыл басынан бергі 9 айда 954 өрт тіркелді. Бұл өткен жылғы осы мерзіммен (824) салыстырғанда 13,5%-ға артық. Тілсіз жаудан қаза тапқандар саны – 23, жарақат алғандар – 21 адам. Келген жалпы шығын 164,5 млн теңгеден асады. Осы және алдағы жылыту маусымындағы өрт қауіпсіздігінің алдын алуына қарсы жүргізіліп отырған шаралар жөнінде облыстық ТЖД бастығы Талғат Кәкімов тілшілермен өткен брифингте мәлімдеді.

Аймағымызда 75 мыңнан астам жеке және 3 мыңнан астам көп қабатты үй бар. Олардың 65%-ы от жағып отыр. Қызыл жалынның 63,8%-ы (609) жеке секторларда тұтанады. Көліктің де жануы сирек емес – 116 (12,2%) өрт тіркелген.

– Өрттің негізгі себебі – адамдардың абайсыздығынан (552 өрт немесе 57,9%). Электр жабдықтарын монтаждау және көшіру кезінде 151, пеш орнату және іске қосу кезінде 89 өрт шықса, қасақана 42 от қойылды, – деді Т.Кәкімов.

Тілсіз жаудың алдын алу мақсатында көп балалы, аз қамтылған, жалғызбасты мүгедектер, зейнеткерлер мен ата-ананың қамқорынсыз қалғандардың баспаналарына барып, қауіпсіздік шаралары жөнінде түсіндіру жұмыстары жүргізілуде. Бұған аудан-қалалардың азаматтық қорғаныс, әкімдік, полиция және әлеуметтік қызмет өкілдері жұмылдырылған. 9 қазанға дейін өңірлік бөлімшелердің қызметкерлері әлеуметтік аз қамтылған 6107 отбасының 3111-іне барып, өрт қауіпсіздігіне тексеру жүргізген кезде 302 өрескелдікті анықтапты.

 

Қыдырбек ҚИЫСХАНҰЛЫ