Қазақы сұлулықты әлемге паш етті

Қостанай политехникалық колледжінің студенті Диана Жолдыбай халықаралық сұлулық байқауының бірінші орын иегері атанды. Мұндай жоғары деңгейде алғашқы рет бақ сыныған Диананың қуанышында шек жоқ.Түркияның Бодрум қаласында өткен «Мисс Аполлон» сайысына АҚШ, Эквадор, Латвия, Украина, Ресей сынды елдерден 15 үміткер қатысқан болатын. Қаракөз қарындасымызға ақылы жағынан да, көркі тұрғысынан да тең келер ешбірі болмады. Осылайша, қазақы сұлулықты айдай әлемге паш етті.
Жалпы, маусым айы Диана үшін сәттілікке толы болды. Себебі, елге оралғанда оын тағы бір марапат күтіп тұрған еді. Ол ғаламтор арқылы дауыс беру нәтижесінде «Автоледи Қостанай» атағына ие болды. Мұндай ірі байқаулар студент қыздың білім алуына еш кедергі келтіріп жатқан жоқ. Керісінше, Диананың үлгірімі жақсы, колледждің ең үздік шәкірттерінің бірі. Қоғамдық іс-шараларға белсене қатысып, ауқымды мерекелік концерттердің жүргізушісі болып көзге түсіп жүр.Ал, негізгі мамандығы – бидай өндіру техник-технологі. Бүгіндері өзі білім алатын оқу орына деген алғысы шексіз. Колледж ұжымы керек кезінде қаржылай көмек көрсетіп, демеушілік жасаған. Қазір шәкірттері шет елдерге жиі шығатындықтан ағылшын тілін оқыту курсына тегін жолдама да сыйға тартып отыр.

 

Фото: kstnews.kz