Уақыт талабына сай
Бүгінгі таңда еліміздің білім беру жүйесіндегі жаңарту үдерісі – білім мазмұны мен сапасын арттыру, оқытудың жаңа технологияларын іс-тәжірибеде қолдану. Сондықтан да білім беру қызметінің сапасы кез келген мемлекеттің білім беру жүйесінің қызметіне баға берудің айқындаушы факторы деп айтамыз. Себебі білім-қоғамның интеллектуалдық капиталын, инновациялық әлеуетін көрсетеді емес пе. Қазіргі уақытта білім берудің басты мақсаты да сол-бәсекеге лайықты, білікті, шығармашыл, оңтайлы кәсібіи маман даярлау. Ал, осы мақсатты жүзеге асыру үшін республикамызда білім беруді дамытудың 2011-2020 жылдарға арналған мемлекеттік бағдарламасы қабылданғаны бәрімізге белгілі. Елбасымыз «Біз еліміз бойынша әлемдік стандарттар деңгейінде сапалы білім беруге қол жеткізуге тиіспіз» деп атап өткен-ді. Білім беру саласындағы өзгерістерге және Қазақстан-2050 стратегиясының жаңа басым бағыттарына байланысты Қазтұтынуодағы Қостанай экономика колледжі аталған стратегия аясында өздерінің негізгі басымдық айқындамасында көрсетілген «Экономика саласындағы мамандардың жан-жақты кәсіби кешенді тұлғасын қалыптастыру үшін жағдайлар жасау» мақсатын орындау үшін барлық мүмкіндіктерді пайдаланып, түлектердің нарықта сұранысқа ие болуын қамтамасыз ету үстінде. 2009 жылдан бастап колледжде сапа менджменті жүйесі енгізілген.
-Студент жастарымыздың үздіксіз, қолжетімді және сапалы білім алуларына жағдай жасау- қазіргі басты міндетіміз деп ойлаймыз. Колледжде барлық жағдай бар, оқытушылармыз білікті. Колледж ұжымын білікті басшы, экономика ғылымдарының кандидаты Қабиболла Хамзаұлы басқарып отыр. Материалдық-техникалық базамыз мысалы, компюьтерлік кластар, дәрісхана уақыт талабына сай, ал, медиатека, кітапхана, оқу залы студент жастардың интерактивтік тәртіпте оқуына мүмкіндік береді. Мәселен, есеп және аудит мамандығын алайық, осы мамандық қай кезеңде болмасын сұранысқа ие, себебі мамандық аясында білім алушы қаржылық және басқару есепті, салық салық қағидаларын, қазақстандық, халықаралық бухгалтерлік есеп стандартын, кәсіпорын қызметін талдаудың әдістемесін үйренеді,-деді колледждің бөлім меңгерушісі Гүлсім Салькина.
1956 жылы құрылған облыстық тұтынушылар одағының Қостанай кооперативтік техникумі бүгінде Қазтұтынуодағы Қостанай экономика колледжі деп аталады. Оқу орнының облыстың әлеуеті үшін білікті мамандар даярлауда алпыс жыл ішінде өзіндік орны, үлесі бар. Міне, осы айтулы мерейлі күнге байланысты өткен салтанатты іс-шараға қатысқан облыс әкімінің орынбасары М. Жүндібаев оқу орнының басшысы Қ. Хамзинді, оқытушылар ұжымын, келген қонақтарды құттықтап, жылы лебізін білдірді, облыс әкімі атынан алғыс хат тапсырды. 
Колледждің осынша жылдар ішінде елімізге үздіксіз сауда, коммерция, басқару, экономика, құқық, халықты әлеуметтік қорғау салаларына білікті, лайықты мамандар даярлап келгенін, солардың ішінде республикамызға танымал ел азаматтарының (Парламент Мәжілісінің төрағасы-О. Мұхамеджанов, ЖШС, кәсіпорындар басшылары) шыққанын, қоғам бейнесі өзгерсе де колледж даярлайтын мамандардың сұранысқа ие екендігін тілге тиек етті. Осы салтанат аясында оқу орнының бір топ оқытушылары, облыс әкімінің, Қазтұтынуодағының, білім басқармасының грамоталарымен марапатталды, сый-құрметтерге ие болды. Келген қонақтар сөз сөйлеп, құттықтауларын жеткізді. Салтанатқа арналған оқу орнының өнерпаз жастары өнерлерін көрсетті.
Гүлназым САҒИТОВА.
Суретті түсірген Айбек ЖҮЗБАЙ.
