САҢЛАҚТАР САПҚА ҚОСЫЛДЫ
Биыл алтыншы мәрте өткiзiлетiн “Қазақстан барысы” республикалық турнирiне Қостанай облысының атынан қатысатын палуандардың есімі белгілі болды. «Қостанай қыраны» бәсекесі үш күнге созылды. Алғашқы күндері балғын палуандардың арасында облысымыздың «жас қырандары» анықталды.
Іріктеу жарысына қатысқан палуандардың арасында олқысы жоқ. Міне, кілең «сен тұр, мен атайындар» жарыстың соңғы күні боз кілемге шықты. Талай додаларда дара шығып жүрген Азамат Ерәділов, Ержан Қабидулинов, Максим Гербер, Ерқанат Рыздық, Данияр Баққараевтар да өз аудандарының намысын қорғау үшін келді. Ылғи бабы келіскен палуандардың белдесуі балалар мен жасөспірімдер спорт мектебіне жиылған қазақ күресінің жанкүйерлерін үлкен әсерге бөледі.
2014 жылғы осы жарыстың жеңімпазы, арқалықтық Ғабит Балғынбаев пен былтырғы «қыран», қостанайлық Ерлан Омаров жартылай финалда кездесті. Бұл екеуінің арасындағы тартыс қызу жүрді. Дегенмен, соңғы секундта Науырзым ауданының тумасы Е.Омаров жеңісті жұлып әкетті.
Сондай-ақ, ақтық белдесуге жолдама үшін қамыстылық Леван Джваридзе мен Қостанай ауданының «Түйе палуаны» Абылайхан Қасымхан жұп құрады. Белдесу басталмай жатып жанкүйерлер тәжірибелі Леван жеңеді деп болжап қойған. Алайда, жас болса да жігерлік танытқан А.Қасымхан қарсыласын тізе бүктірді. Еске сала кетсек, сақа палуандардың сұрыптауына түскен Абылайханның жасы жиырма бірде ғана. 
Бір-бірінің айла-тәсілдерін жаттап алған Е.Омаров пен А.Қасымхан өзара кім мықтыны анықтады. Тәжірибесі мол Ерлан аздаған басымдықпен жеңіске жетті. Сөйтіп, "Қостанай қыраны" атанған палуанға арнайы кубок пен 150 мың теңге табыс етілді.
– «Қостанай қыраны» жоғары деңгейде ұйымдастырылды. Жартылай финалға дейінгі белдесулердің бәрі де тартысты өтті. Жыл сайын турнирдің маңыздылығы артып келедi. Ерлан да, Абылайхан да – талантты палуандар. Менің көз алдымда жаттығатын жігіттер ғой. Оларға республикалық турнирде сәттілік тілеймін, – дедi облысқа еңбегі сіңген жаттықтырушы Бейсенбай Әубәкіров.
Енді финалға шыққан екеуі Астанада өтетін "Қазақстан барысы" турнирінде облыс намысын қорғайтын болады.
Қасқырбай Қойшыманов.
Суретті түсірген Айбек Жүзбай.
