«Елін сүйген, елі сүйген Елбасы»

 Міне, осындай атпен  Қазақстан Республикасы ІІМ Қостанай академиясында  салтанатты іс-шара болып өтті. Салтанат Қазақстан Республикасының  Әнұранының  орындалуымен ашылды.   Оны академияның  үрмелі аспаптар оркестрі сүйемелдеді.

Іс-шараны академия бастығы заң ғылымының кандидаты, профессор, полиция полковнигі Мирлан Қызылов ашып,  жиналғандарды айтулы күнмен құттықтай отырып, сөз кезегін академияның құрметті қонағы, тыл ардагері, ардагерлер кеңесінің мүшесі Жұмабай Байжановқа берді. Ардагер Жұмабай Байжанов өз сөзінде жиналғандарға Елбасының еңбегі мен тарихы туралы қысқаша әңгіме айтты.

 Осы салтанат аясында  оқу ордасының профессорлық-оқытушылар құрамы мен қызметкерлерінің бір тобы Қазақстан Республикасы Ішкі істер министрінің, академия бастығының бұйрықтарымен қызметтік міндеттерін адал орындап, көрсеткен жетістіктері үшін мерзімінен бұрын атаққа иеленді, «Құқық тәртібін қамтамасыз етуге қосқан үлесі үшін» медальімен, «ІІО үздігі» төсбелгісімен, құрмет грамотасымен, алғыс хаттармен марапатталды.

Сондай-ақ, осы іс-шара барысында  құқық қорғау органында көп жылдар бойы адал қызмет атқарып, оқу ордасының дамуына өз үлестерін қосқан полиция подполковнигі Вячеслав Пряхин және полиция аға лейтенанты Уәли  Тюлегеновты академияның профессорлық-оқытушылар құрамы, қызметкерлері құрметті демалысқа шығарып салды. Құрметті де сыйлы ардагерлерге жылы-жылы лебіздерін білдіріп, алғыстарын айтты.

Салтанатты іс-шара барысында  жиналғандар Елбасы Н.Назарбаев туралы бейнероликті тамашалады. Жиын соңы  мерекелік концерттік бағдарламаға ұласты. Концерттік бағдарлама аясында тыңдаушылар Н.Назарбаевтың сөзіне жазылған  А.Қоразбаевтың «Үш қоңыр» әнін, «Өз елім», «Тәуелсіздігім теңдігім» «Көк тудың желбірегені» әндерін тыңдады. Күндізгі оқыту факультетінің 2 курс тыңдаушысы жас ақын Тельман Құдайберген  «Тәуелсіздік туы» атты өлеңін оқыды.

 

 

Гүлназым Сағитова