Антология жарық көрді
Жақында «Қарлығаш» баспасынан өңірдің біраз ақын-жазушыларының «Торғай, Тобыл тоғысып» атты антологиялық жинағы жарық көрді. Бұл кітаптың жарыққа шығуына өңірге белгілі прозашы, экономист-оқытушы Әбутәліп Әмір мұрындық болды. Поэзия және проза бөлімінде есімі елімізге кеңінен танымал ақын-жазушылар: Жолбарыс қажы Баязид, Ғұмар Ахметчин, Серікбай Оспанұлы, Дәмір Әбіш, Ақылбек Шаяхмет, Нағашыбай Мұқатов, Жұмағали Арғынбаев, Әсия Беркенова, Әлпия Орманшина, Нұрқанат Құлабаев, Абылай Мауданов, Тұрсынмәмет Бұқабаев, Дәуренбек Әбдібек және т.б. таланттардың шығармалары жарияланған.Құрастырушы Әбутәліп Әмір кітаптағы алғы сөзінде: «Ел мен жердің тағдырына, оның өркендеуі мен өсуіне, тарихи дамуына оң ықпал жасаған қазақ зиялыларының Торғай мен Қостанай өңіріне тиесілі еншісінің өлшеусіз мол екеніне ешкім шек келтірмесе керек. Қазаққа Шоқан мен Ыбырайды, Ахмет пен Міржақыпты берген қасиетті өлке олардан кейін де әдебиет пен мәдениет, ғылым мен өнер саласында небір саңлақтарды туғызды…» деп бастап, Торғай мен Тобыл атырабының тек қана әдебиеттегі өкілдерінің шығармаларын түгендеп шығудың өзі аз жүк болмағандығын айта келіп, тек қазіргі таңда Торғай мен Қостанайды мекен етіп отырған авторлардың еңбегін кітапқа енгізгендігін және олардың өзі ұсынғандығын баяндайды.
Кітап барлық әдебиет сүйер оқырман қауымға арналған. Құрастырушы бұл еңбегін Қостанай облысының 80 жылдық торқалы тойына және Тәуелсіздігіміздің 25 жылдығына арнайы арнапты.
Нұрболат МЕШІТБАЕВ
