Жалған ақша жасап келген

Жітіқара аудандық сотында жалған ақша жасау дерегі бойынша қылмыстық іс қаралып жатыр. Бұл былтырғы жылы болған осындай қылмыс түрінің жалғыз оқиғасы. Осы жайында облыстық прокуратурада өткен баспасөз жиынында құзырлы органның 2-ші басқармасының аға прокуроры Мақсат Төлеуленов баяндады:

– Қылмыстық топ қолданыстағы түрлі-түсті принтерден банкноттарды заңсыз басып шығарумен айналысып келген. Топ мүшелері жалған ақшаларды біздің өңіріміз бен Қарағанды, Алматы облыстарында айналымға шығарып отырған. Олардың арасында бұған дейін де жалған ақша жасап, жазасын өтегендердің бар екені анықталды.

Белгілі болғандай, қылмыстық топ көбіне 5 мың теңгелік банкноттарды жасап келіпті. Себебі олар қолға түскен уақытта қызыл түсті жалған ақшалар тәркіленіп алынған екен. Мақсат Төлеуленов сот ісінің әлі аяқталмағанын, алдағы күндері мән-жайдың толық белгілі болатынын жеткізді.  

 

Қыдырбек ҚИЫСХАНҰЛЫ